नेपालकै ठूलो नदी सप्तकोसीले धार परिवर्तन गर्दा बेलका नगरपालिकाका बस्ती जोखिममा परेका छन् । एक हप्तादेखि लगातार परेको वर्षाका कारण सप्तकोसीले पश्चिमतर्फ धार परिवर्तन गर्दा बेलका नगरपालिकाका वडा नं २ , ३ , ८ र ९ उच्च जोखिममा परेका छन् । सप्तकोसीको बाढीले सोमबारे, डुम्रीबोटे, धौडी, चिलिमे, एबिसी, श्रीलंका टापु र रामनगरका २५ सय परिवार उच्च जोखिममा परेका हुन् ।

आइतबार दिउँसो बेलका नगरपालिकाको सभाहलमा उदयपुर जिल्ला विपद् ब्यबस्थापन समितिको बैठकले उच्च जोखिममा रहेको वडाहरूका स्थानीयलाई उद्दार तथा राहतको ब्यवस्थापन गर्ने निर्णय गरेको थियो ।

निमित्त प्रमुख जिल्ला अधिकारीको अध्यक्षतामा बसेको र बैठकले सप्तकोसीमा आएको उच्च बाढीले बेलका–८ लाउरेको खोज परियोजना नजिकैबाट कटान गर्दै नदीको धार परिवर्तन गरेकाले नगरको २, ३, ८ र ९ तथा सप्तरी जिल्लाका विभिन्न स्थानमा समेत जनधनको क्षतिलाई मध्यनजर गरेर तत्कालै बाँध लगाउने, ह्याब्बी इक्युपमेन्ट प्रयोग गर्ने, सिचाइँ डिभिजनसँग नगरपालिकाको सहकार्यमा लन्चिङ ड्याम, स्यान्ट रकिङ र तारजाली भर्नेलगायतको निर्णय गरेको नगर प्रमुख दुर्गाकुमार थापाले केटिएम दैनिकलाई बताए ।

त्यसबाहेक हाल धार परिवर्तित क्षेत्रतर्फ बालुवा भरेको बोरा, माटो खयरको हाँगा लगाउने काम भइरहेको जनाउँदै कटानका सम्भावित क्षेत्रका स्थानीयलाई उद्दार तथा राहतको ब्यवस्थापन गर्ने निर्णय भएको बताए ।

उनका अनुसार कोसी कटानका कारण बेलका नगरपालिकामा २५ सय घर परिवार उच्च जोखिममा रहेका छन् । तत्कालीन ब्यवस्थाका लागि प्रदेश, सङ्घ सरकार, प्रहरी, सेना तथा स्थानीयलाई अनुरोध गरिएकोसमेत उनले जानकारी दिए ।