मोरङमा आफ्नै छोरी बलात्कार गरेको आरोपमा नेपाली सेनाका पूर्वजम्दार पक्राउ परेका छन् ।
पक्राउ पर्नेमा बेलबारी नगरपालिका–११ का ५१ वर्षीय पुरुष रहेको जिल्ला प्रहरी कार्यालय मोरङका प्रहरी नायव उपरीक्षक दीपक श्रेष्ठले केटिएम दैनिकलाई जानकारी दिए ।
डीएसपी श्रेष्ठका अनुसार उनीमाथि गत वर्षको माघ २० गते आफ्नै १४ वर्षीय छोरी बलात्कार गरेको आरोप छ । उनले भने, ‘आफ्नै छोरीमाथि बलात्कार गरेको भन्दै भदौ ४ गते किटानी जाहेरी परेको छ । सोही आधारमा पक्राउ गरेर हिरासतमा लिँदै घटनाका बारेमा थप बुझ्ने काम भइरहेको छ ।’
पक्राउ पर्ने पुरुष नेपाली सेनाका पूर्वजम्दार रहेको प्रहरी स्रोत बताउँछ । तर डिएसपी श्रेष्ठले भने यसबारे विस्तृत खुल्न बाँकी रहेको बताउँदै सोमबार जिल्ला अदालत मोरङबाट म्याद थप गराउने तयारी रहेको सुनाए ।
‘हामीलाई पदसँग सरोकार भएन, अपराधसँग सरोकार हो’, उनले भने, ‘पक्राउ परेकामाथि अनुसन्धान जारी छ । भोलि म्याद थप हुनेछ ।’
पक्राउ परेका उनलाई इलाका प्रहरी कार्यालय बेलबारीको हिरासतमा राखिएको छ ।
२०७७ साल माघ २० गते राति आफ्नै घरमा धाकधम्की दिँदै डर देखाएर छोरीलाई बलात्कार गरेको उनीमाथि आरोप छ । उनका अनुसार पीडितको स्वास्थ्य परीक्षणलगायतका प्रक्रिया पनि अघि बढाइसकिएको छ ।