प्रेस काउन्सिल नेपालले आपसमा मिल्दाजुल्दा डोमेनका न्युज पोर्टल सूचीकरण नगर्ने भएको छ।
शुक्रबार काउन्सिलले एक सूचना जारी गर्दै दर्ता भएर सञ्चालनमा आइसकेका चर्चित मिडियालाई आधार बनाइ अगाडि वा पछाडि कुनै अङ्क वा अक्षर जोडेर डोमेन दर्ता/मिडिया दर्ता गराइ मिल्दोजुल्दो मास्टहेड, लोगो र नाम लिएर सूचीकरण हुन आएमा त्यस्ता न्युज पोर्टललाई सूचीकरण नगर्ने जनाएको हो।
काउन्सिलको हालै बसेको आचारसंहिता अनुगमन उपसमितिको बैठकमा यस्तो निर्णय गरेको हो। असारको पहिलो साता प्रेस काउन्सिल नेपालमा सोसल मिडिया व्यवस्थित गर्ने सम्बन्धमा सरोकारवालासँग अन्तरक्रिया कार्यक्रममा केटिएम दैनिकका पवन पौडेलले प्रेस काउन्सिलले सुन्दा उस्तै उस्तै लाग्ने तर केही फरक हिज्जे भएका डोमेनहरू सूचिकरण भैरहेको हुनाले यसलाई रोक्नुपर्ने बताएका थिए । अहिले उक्त कुराको सम्वोधन भएको हो ।
विधिवत् रुपमा पहिले नै सञ्चालित अनलाइन मिडियाबाट काउन्सिलमा पटकपटक यस्ता उजुरी/गुनासाहरू आउने गरेको भन्दै अबदेखि यस्ता मिडिया दर्ता नहुने जनाएको हो।