झापाको शिवसताक्षी नगरपालिकामा जङ्गली हात्तीको आतङ्कले स्थानीय हैरान बनेका छन् । शिवसताक्षी नगरपालिकाको १० नम्बर र ११ नम्बर वडामा जङ्गली हात्तीले बालिनाली र जनधनमा क्षति गर्न थालेपछि स्थानीय हैरान बनेका हुन् ।
तीन वटा हात्तीको एक समूहले दुवै वडाका स्थानीयलाई हैरान बनाएको शिवसताक्षी नगरपालिकाकी उपप्रमुख भोजकुमारी नेपाल बताउँछिन् । उनका अनुसार सोमबार बिहान हात्तीको उक्त बथानले वडा नम्बर ११ का सातवटा घर भत्काएको थियो । त्यसबाहेक मकै र धानवालीमा समेथ क्षति पुर्याएको उपप्रमुख नेपालको भनाइ छ ।
वडा नं १० का एक जनालाई हात्तीले गम्भीर घाइते बनाएको सुनाउँदै उनले एक सातायता निरन्तर रूपमा हात्तीले दुःख दिइरहेको बताइन् । उनका अनुसार चन्द्रबबहादुर थेवे, बलबहादुर राई, भीमकुमार राई, अनिल लिम्बू, रत्न राई, टेकबहादुर राई, नरप्रसाद लक्सम र रोशन थेवेको घर हात्तीले पूर्ण रूपमा भत्काएर विजोग बनाएको छ । साथै घरमा रहेको अन्नबालीसमेत हात्तीले नस्ट पारेको छ ।
नजिकै रहेको रतुवामाई वृक्षरोपण आयोजनाको जङ्गलमा दिनभर हात्तीहरू लुकेर बस्ने र रातको समयमा गाँउ छिर्ने गरेकाले स्थानीयहरू रातभर जाग्राम नै बस्नुपर्ने अवस्था आएको छ । यता, नगरपालिकाले भने हात्ती धपाउन साइरनको व्यवस्था गर्नुका साथै प्रभावितलाई सहयोग गर्ने प्रतिबद्धता जनाएको छ ।
‘त्यहाँका स्थानीय हात्तीबाट बढी नै प्रभावित हुनुहुन्छ’, उपप्रमुख नेपालले केटिएम दैनिकसँग भनिन्, ‘वडा कार्यालय र प्रहरीमार्फत सर्जिमिन गराएर ल्याएमा सहयोग गर्ने निर्णय गरेका छौँ । त्यसबाहेक हात्ती धराउन तत्कालै नगरपालिकाको कार्यपालिका बोर्डबाट निर्णय गराएर स्थानीयलाई साइरन उपलब्ध गराउँछौँ ।’