कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको ३ वर्ष बितिसक्दा पनि हत्यारा पक्राउ नपरेको भन्दै मङ्गलबार साँझ मिसन टू सपोर्ट र फेसबुक ग्रुप वुमेन्स रुम रिलोडेडले माइतीघर मण्डलामा प्रदर्शन गरेका छन् ।
प्रदर्शनको क्रममा प्रदर्शनकारीले हत्यारा पक्राउ गर्न सरकारलाई दबाब दिँदै पन्तको सम्झनामा दीप प्रज्वलनसमेत गरेका छन् ।
निर्मला हत्या भएको तीन वर्ष बितिसकेको छ । १३ वर्षीया बालिका निर्मला पन्त विद्यालयको गृहकार्य गर्ने भन्दै २०७५ साउन १० गते दिउँसो घरबाट निस्केर साथीको घर गएकी थिइन्‚ र सोही दिनदेखि नै बेपत्ता भइन् । त्यसको भोलिपल्ट घरभन्दा एक किलोमिटरको दुरीमा रहेको उखुबारीमा बलात्कार गरेर हत्या गरिएको अवस्थामा उनको शव फेला परेको थियो ।
उक्त घटनामा संलग्न दोषीलाई सरकारले अझै कारबाहीको दायरामा ल्याउन सकेको छैन । केहीदिनअगाडी प्रधानमन्त्री शेर बहादुर देउवाले गृहमन्त्री र प्रहरी प्रमुखलाई बालुवाटारमा बोलाएर उक्त घटनाको अनुसन्धान कहाँसम्म पुग्यो भनेर जानकारी लिएका थिए । उनले चाँडोभन्दा चाँडो हत्यारालाई कारबाही गर्न समेत निर्देशन दिएको बताएका थिए ।
उता कञ्चनपुरमा रहेकी निर्मलाकी आमा दुर्गादेवी पन्तले देउवा सरकारले आएपछि आफ्नो छोरीको हत्यारा पत्ता लाग्नेमा आशावादी छिन् ।
तस्बिरहरू:
