विराटनगरमा ‘पैसा डबल बनाइदिन्छु’ भनेर ठगी गर्ने एक जनालाई प्रहरीले पक्राउ गरेको छ । पक्राउ पर्नेमा विराटनगर महानगरपालिका–८ अशोक चोकका ३५ वर्षीय चन्दनकुमार मुखिया रहेको जिल्ला प्रहरी कार्यालय मोरङले जानकारी दिएको छ ।
मोरङ प्रहरी प्रवक्ता डिएसपी दीपक श्रेष्ठका अनुसार गत असार २७ गते अपराह्न ४ बजे उनले स्थानीय ३१ वर्षीय राजकुमार रायलाई पैसा डबल बनाइदिन्छु भनेर दुई लाख २० हजार लिएर फरार भएका थिए ।
मुखियाले असार २७ गते रायसँग दुई लाख २० हजार लिएका थिए । त्यसपछि एउटा बाल्टिन र चोखो पानी ल्याउन लगाएका थिए । यस्तै, २ वटा गोल्डेन कलरको कागज झिकेर पोको बनाएर दुई वटा केमिकल र सिरिन्जसमेत रायको हातमा थमाएका थिए । ‘२४ घण्टामा यो पोकोमा केमिकल सिरिन्जबाट हान्नु पैसा डबल हुन्छ’ भनेर उनी त्यहाँबाट फरार भएका थिए ।
त्यसपछि राय उजुरी लिएर जिल्ला प्रहरी कार्यालय मोरङ पुगेका थिए । उजुरीपछि खोजतलासमा लागेको प्रहरीले सोमबार (आज) दिउँसो साढे १ बजे मुखियालाई नियन्त्रणमा लिएको हो ।
उनीमाथि ठगी कसुरमा थप अनुसन्धान कार्य भइरहेको डिएसपी श्रेष्ठले जानकारी दिए ।