सोमबार जनता समाजवादी पार्टीका नेताहरू परिचय पत्र बोकेरै निर्वाचन आयोगमा उपस्थित भए । काम थियो पार्टी विभाजनका लागि टाउको देखाउनु । निर्वाचन आयोगले टाउको गनेरै सनाखत गर्ने भनेपछि उनीहरू आयोग पुगेका हुन् ।
आयोग पुगेर उनीहरूले विभाजनका लागि बहुमत पुर्याउन एक पक्षमा सनाखत गरेर निस्किए । अध्यक्ष उपेन्द्र यादव पक्षमा बहुमत देखियो । अर्थात् दुई तिहाइ सदस्यले यादवको पक्षमा सनाखत गरे । अर्का अध्यक्ष महन्थ ठाकुर पक्षमा अल्पमत सदस्यले सनाखत गरे । सनाखत गर्ने सांसदको सङ्ख्याका आधारमा यादव पक्षले आधिकारिकता पाउने करिब पक्का भएको छ ।
जसपामा रहेका ५१ जना कार्यकारिणी सदस्यमध्येमा आफूहरूको पक्षमा दुई तिहाइ सदस्यले हस्ताक्षर गरेको अध्यक्ष उपेन्द्र यादवले बताए । आधिकारिकता पाउने भएपछि यादव पक्ष उत्साहित देखियो भने ठाकुर पक्ष निराश । यादव उत्साहित र हँसिलो देखिए ।
उनले पार्टी आफ्नो कब्जामा आइसकेको बताए । ‘हाम्रो पक्षमा अहिलेसम्म ३४ जना सदस्यले हस्ताक्षर गरिसकेका छन् । अझै रेसम चौधरी पनि आउँदै हुनुहुन्छ,’ अध्यक्ष यादवले भने, ‘यो सङ्ख्या अझै बढ्न सक्छ। हाम्रो पक्षमा, पार्टी एकताको पक्षमा पूरा बहुमत आएको छ।’
जता शक्ति उतै भक्ति
महन्थ पक्षलाई साथ दिँदै आएको केही नेताले अन्तिममा आएर उपेन्द्र पक्षलाई साथ दिए । यसअघि केपी शर्मा ओली नेतृत्वको सरकारमा सहभागी नेता समेत यादवको पक्षमा आए । ओली सत्ताबाट बाहिरिएसँगै ठाकुर पक्ष निरीह भएर आधिकारिकता पनि गुमाउने पक्का भएको छ । यादवलाई महन्थ ठाकुर पक्षका राजकिशोर यादव र मनीषकुमार सुमनले पनि साथ दिएका छन् ।
नवलकिशोर साह पनि अध्यक्ष उपेन्द्र यादव समूहमा लागेका छन् । यसअघि महन्थ ठाकुर समूहमा रहेका उनी सोमबार निर्वाचन आयोगमा भएको ‘हेडकाउन्ट’मा उनी यादव पक्षमा खुलेका हुन् । उनी जसपामा ठाकुर समूहका वरिष्ठ नेता राजेन्द्र महतो निकट मानिन्थे ।
त्यस्तै हाल जेलमा रहेका रेसम चौधरीले पनि आफूहरूलाई नै साथ दिने दाबी यादवले गरेका छन् । उनलाई जेलबाट ल्याएर निर्वाचन आयोगमा सनाखत गराउने तयारी भएको छ । यादव यसअघि ठाकुर पक्षले केपी शर्मा ओली नेतृत्वको सरकारमा जाँदा मन्त्री पनि भएका थिए । तर अहिले आएर शक्तिहीन भएका ठाकुरलाई यादवले पनि छाडेका हुन् ।
अहिले ठाकुर पक्षले कार्यकारिणी समिति र संसदीय दल दुवैमा आफ्नो शक्ति गुमाएको छ । कुनै बेला दुवैतिर बहुमत रहेको ठाकुर पक्ष अहिले कमजोर बनेको छ । ठाकुरलाई दुवैतिर ४० प्रतिशत पुर्याउन पनि समस्या भएको छ । राजनीतिक दल विभाजनसम्बन्धी विद्यमान कानुनमा अहिले दल र पार्टी केन्द्र दुवैतिर ४० प्रतिशत पुगे मात्रै पार्टी विभाजन गर्न सकिन्छ ।
रातारात भएको एकता..
तत्कालीन राष्ट्रिय जनता पार्टी तराई मधेसमा सक्रिय अन्य पाँच दल मिलेर बनेको थियो । तत्कालीन राजपा र समाजवादी पार्टीबिच २०७७ वैशाख १० गते राति एकता भएको थियो । विभाजनलाई सहज बनाउन सरकारले तत्कालीन केपी ओली नेतृत्वको सरकारले अध्यादेश जारी गरेपछि समाजवादी फुट्ने अनुमान गरिएका बेला समाजवादी र जनताबिच रातारात एकता भएको थियो ।
उनीहरूबिच रातारात एकता हुँदा पनि कुनै खास राजनीतिक एजेन्डा थिएन । विभाजनमा पनि छैन । पहिलो पटकको प्रतिनिधि सभा विघटनमा जसपा एकसाथ थियो । दोस्रो पटक प्रतिनिधि सभा विघटन हुँदा जसपाको महन्थ पक्ष विघटनको पक्षमा लाग्यो । ओली सरकारमा सहभागीसमेत भयो । ओली सरकारको बहिर्गमनसँगै महन्थ पक्ष पनि नाटकीय रूपमा विपक्षी गठबन्धनमै आयो । प्रधानमन्त्री शेरबहादुर देउवालाई विश्वासको मत दियो । अहिले फेरि सरकारमा जाने तयारीमा छ ।