असार मसान्तदेखि निषेधाज्ञा हटाइएपछि प्रदेश १ को पहाडी जिल्ला भोजपुरमा मानिसहरूको चहलपहल बढेको छ । दुई महिनासम्म जारी निषेधाज्ञा हटाइएपछि सर्वसाधारण स्वास्थ्य मापदण्ड पालना नगरी काममा व्यस्त बनेका छन् ।
जिल्लामा अझै पनि कोरोना भाइरसको जोखिम घटेको छैन । बरु कोरोना सङ्क्रमितको सङ्ख्या दिनानुदिन बढ्दो अवस्थामा देखा परिरहेको छ । तर निषेधाज्ञा हटाउने जिल्ला प्रशासन कार्यालय भोजपुरको निर्णयले सङ्क्रमितको ग्राफ माथि उक्लिरहेको देखिएको छ ।
जिल्ला प्रशासन कार्यालय भोजपुरका सूचना अधिकारी रामप्रसाद दाहालका अनुसार आइतबार जिल्लामा २३ जना नयाँ सङ्क्रमित थप भएसँगै कुल सङ्क्रमितको सङ्ख्या एक हजार तीन सय ११ पुगेको छ । यसमध्ये सक्रिय सङ्क्रमितको सङ्ख्या एक सय ७३ रहेको छ ।
भोजपुरमा परीक्षणका लागि आउनेहरूमा दैनिक जसो नै सङ्क्रमित भेटिएको उनले बताए । ‘परीक्षणको दायरा बढाउने हो भने सङ्क्रमितको सङ्ख्या अझै उकालो लाग्न सक्छ’, केटिएम दैनिकसँग सूचना अधिकारी दाहालले भने, ‘निषेधाज्ञा हटेपछि मानिसहरूको चहलपहल जसरी नै सङ्क्रमितको सङ्ख्या बढिरहेको छ ।’ उनका अनुसार भोजपुरमा हाल पिसिआर परीक्षण भन्दा पनि बढी एन्टिजेन विधिबाट परीक्षण हुँदै आइरहेको छ ।
यस्तै, तत्काल निषेधाज्ञा जारी गर्ने मनसाय नभएको जिल्ला प्रशासनले जानकारी दिएको छ । ‘डिसिसिएमसीको बैठकले असार ३१ गतेबाट निषेधाज्ञा हटाउने निर्णय गरेको हो’, दाहालले भने, ‘अहिले तत्कालै निषेधाज्ञा पुनः लगाउने कुनै योजना छैन । सर्वसाधारणलाई स्वास्थ्य सुरक्षा मापदण्ड पालना गर्न अनुरोध गरिरहेका छौँ ।’
जिल्लाको तथ्याङ्कअनुसार कोरोना सङ्क्रमितको सङ्ख्या अहिले सदरमुकाम रहेको भोजपुर नगरपालिकामा बढी छ । जहाँ अहिलेसम्म दुई सय ९२ जना सङ्क्रमित देखिएका छन् । त्यसबाहेक अहिलेसम्म हतुवागढी गाउँपालिका एक सय ९२ जना, साल्पासिलिंछो गाउँपालिकामा एक सय ७७ जना, रामप्रसाद राई गाउँपालिकामा एक सय ६२ जना, अरुण गाउँपालिका एक सय ५९ जना, टेम्केमैयुङ गाउँपालिकामा एक सय २६ जना, षडानन्द नगरपालिकामा एक सय २२ जना, आमचोक गाउँपालिका ४८, र पौवादुङमा गाउँपालिकामा ३२ जना कोरोनाका सङ्क्रमित भेटिएको सूचना अधिकारी दाहालले बताए ।
भोजपुरमा हालसम्म एक हजार ९८ जना सङ्क्रमित निको भएका छन् भने आठ जनाको उपचारका क्रममा ज्यान गएको छ ।