अफगानिस्तान शान्ति प्रक्रिया पाकिस्तानले इमानदार भूमिका निभाउनुपर्ने अफगान राष्ट्रपति असरफ घानीले बताएका छन् ।
राष्ट्रपति घानीले पाकिस्तानी सेना प्रमुख जेनरल कमर जाभेद बाज्वा र अफगानिस्तानस्थित बेलायतको सशस्त्र बलका प्रमुख जेनरल सर निक कार्टरसँग भेटवार्ता गदै अफगानिस्तान शान्ति प्रक्रियामा पाकिस्तानको भूमिकाबारे छलफल गरेका छन् ।
अफगानिस्तानको शान्ति प्रक्रियामा पाकिस्तानको भूमिका इमानदार र निष्कपट हुनुपर्ने राष्ट्रपति घानीले बताएका छन् । भेटवार्तामा राष्ट्रपति घानीले मुलुकमा बढ्दो हिंसा र द्वन्द्वको बारेमा पनि छलफल गरे ।
अफगानिस्तान शान्ति प्रक्रिया तथा तालिबान विद्रोही समूहमाथि प्रभावका लागि क्षेत्रीय मुलुकहरू बिशेषगरि पाकिस्तानको भूमिका महत्त्वपूर्ण रहने राष्ट्रपति घानीले बताए ।
अफगानिस्तान र पाकिस्तानबिच पारस्परिक सम्मान, मैत्रीपूर्ण छिमेकी र आर्थिक सहकार्यको विकल्प नरहेको पनि उनले बताए । अफगानिस्तानमा जारी द्वन्द्वका लागि सैन्य समाधानको औचित्य नरहेको भन्दै सैन्य समाधानका लागि तालिबानको दबाब अफगान जनताका लागि स्वीकार्य नहुने राष्ट्रपति घानीले बताए ।
अफगानिस्तानमा आतङ्कवाद विरुद्ध बिस वर्ष लामो युद्ध सफल भएको भन्दै अमेरिकाले आफ्नो सेना फर्काइरहेको बेला पुन तालिबान र अफ्गानी सुरक्षा बल बिच द्वन्द्व चर्किएको छ ।
