स्पेनिस महारथी क्लब रियल मड्रिडले आइतबार (आज) प्रि–सिजनअन्तर्गत पहिलो मैत्रीपूर्ण खेल खेल्दै छ । नेपाली समयअनुसार आज राति १०ः४५ बजे हुने उक्त मैत्रीपूर्ण खेलमा रियलले स्कटल्यान्डको रेन्जर्सससँग खेल्न आँटेको हो ।
कार्लो एन्सेलोट्टी नेतृत्वको रियलको टोली उक्त खेलका लागि स्कटल्यान्ड पुगिसकेको छ । यो खेल १२ हजार दर्शकमाझ हुने अपेक्षा गरिएको छ । रियलले ५०४ दिनपछि पहिलो पटक दर्शकमाझ खेल्ने छ ।
पछिल्लो पटक रियलले ८ मार्च २०२० मा दर्शकमाझ खेलेको थियो । स्टेडियो बेनिटो भिल्लामारिनमा उसले रियल बेटिसविरुद्ध दर्शक राखेर खेलेको थियो । तर त्यसयता उसले दर्शकबीच खेल्ने मौका पाएको थिएन ।
स्कटल्यान्डमा युरो कपदेखि नै क्षमताभन्दा २५ प्रतिशत कम दर्शक राखेर फुटबल खेल्न अनुमति दिइएको छ ।