राष्ट्रिय प्रजातन्त्र पार्टीका अध्यक्ष कमल थापाले काँग्रेस र कम्युनिस्ट बिच वैचारिक, चरित्रगत, नीतिगत कार्यशैलीमा भिन्नता नरहेको बताउँदै काँग्रेस र कम्युनिस्टको विकल्प राप्रपा मात्र हुन सक्ने बताएका छन् ।
आज काठमाडौँको क्षेत्र नं. ५ (क) ले आयोजना गरेको अगुवा कार्यकर्ता भेला तथा पार्टी प्रवेश कार्यक्रममा बोल्दै अध्यक्ष थापाले चौध वर्ष अघि आमूल परिवर्तनको नाममा गणतन्त्र, धर्मनिरपेक्षता र सङ्घीयता षड्यन्त्रमूलक ढङ्गले लादिएको बताए । अध्यक्ष थापाले मुलुकमा व्याप्त विकृति, विसङ्गति र बेथितिको अन्त्य चाहने हो भने अब जनताको रोजाई राप्रपा हुनुपर्ने बताएका छन् ।
थापाले धर्मनिरपेक्षताको आडमा सङ्गठित र योजनाबद्ध रूपमा सनातन धर्म माथि आक्रमण भइरहेको बताउँदै प्रमुख नेताहरूको अकर्मण्यताले विदेशी चलखेल बढेको समेत बताए । नेपालीको पहिचान, राष्ट्रिय एकताको आधार, समाज, राष्ट्र र परिवार सञ्चालन गर्ने आधारलाई नष्ट गरेर विदेशी संस्कृति र धर्म लाद्ने काम भएको आरोप समेत लगाए ।
पार्टीको महाधिवेशन र स्थानीय तहको निर्वाचनको तयारी तीव्र पार्न कार्यकर्ताहरूलाई निर्देशन दिँदै थापाले सङ्गठन सुदृढीकरण, सक्रिय सदस्यता वितरण अभियान र जनताको सुख दुःखमा उच्च प्राथमिकता साथ काम गर्न आग्रह गरे ।
काँग्रेस र कम्युनिस्टको असफलता, भ्रष्टाचार र कुशासनको भण्डाफोर गर्दै देशव्यापी आन्दोलनमा जानुपर्ने आवश्यकता औँल्याउँदै थापाले जनताले विकल्प खोजेका छन्, अबको विकल्प राप्रपा बनाउनको निमित्त सक्रियता पूर्वक काम गर्न जोड दिए ।
कार्यक्रममा नेकपा एमालेका काठमाडौँ जिल्ला सदस्य न्युक्षे महर्जन सहित सयौँ राप्रपा प्रवेश गरेको बताइएको छ ।
