नेपाल कम्युनिस्ट पार्टी एमालेका अध्यक्ष केपी शर्मा ओली पार्टी एकताका लागि अडिग देखिएका छन् । बुधबार ललितपुरको च्यासलस्थित तुलसीलाल स्मृति प्रतिष्ठान भवनमा केन्द्रीय समितिको बुधबारको बैठकका क्रममा पार्टी एकताका लागि अन्तिम समयसम्म प्रयास जारी राख्ने बताएका उनी थप लचिलो बनेका हुन् ।
पार्टी प्रवक्ता प्रदीप ज्ञवालीका अनुसार पार्टी एकताकै लागि ओली माधव नेपाललाई दोस्रो अध्यक्ष बनाउन पनि तयार देखिएका छन् । ‘पार्टी एकताका लागि अन्तिम समयसम्म प्रयास जारी राख्ने प्रतिबद्धता अध्यक्ष ओलीले बैठकमा राख्नु भएको छ’, बैठकपछि सञ्चारकर्मीसँग कुरा गर्दै पार्टी प्रवक्ता ज्ञवालीले भने, ‘तर पार्टी आन्दोलनलाई घात गर्ने कुनै पनि खालका हर्कतलाई भने सफल हुन नदिइने अध्यक्ष ओलीले बताउनु भयो ।’
१० बुँदे सहमिति कार्यान्वयमा आफू प्रतिवद्ध रहेको बताउँदै ओलीले एकता भएमा सबै संरचनाहरू २०७५ साल जेठ २ गतेकै अवस्थाबाट क्रियाशील हुने पनि उल्लेख गरेका थिए । नेता नेपालले पार्टी एकताका लागि आफूलाई दोस्रो अध्यक्ष बनाउनुपर्ने माग राखेको र आफूले कार्यदलका सदस्यहरूलाई त्यसका लागि तयार छु भनेको उनले सुनाए ।
‘मैले भनेको छु, पार्टी एकता बचाउन माधव नेपाल आउँछन् भने दोस्रो अध्यक्ष दिन तयार छु’ ओलीले भने, यतिभन्दा पनि एकताप्रति इच्छा देखाइएको छैन, अनेक बाहना खोजिएको छ ।’
एमालेले पार्टी जीवनमा प्रतिकूल परिस्थिति आएको निष्कर्ष निकाल्दै त्यसबाट निराश नभई पार्टीको पक्षमा दृढतापूर्वक उभिन पनि सिङ्गो पार्टी पंक्तिलाई आह्वान गरेको छ । तीन दिनदेखि जारी एमाले केन्द्रीय समिति बैठक भोलि पनि बस्नेछ ।
