पोष्ट कोभिडको सङ्क्रमणको कारण भारतको राजधानी नयाँ दिल्लीमा उपचार गराइरहेका पूर्वप्रधानमन्त्री झलनाथ खनाललाई प्रधानमन्त्री शेर बहादुर देउवाले फोन गर्दै ढुक्क भएर उपचार गर्न सुझाएका छन् ।
पूर्व प्रधानमन्त्री खनाललाई देउवालले खुमलटार पुगेका बेला माओवादी केन्द्रका अध्यक्ष पुष्पकमल दाहाल ‘प्रचण्ड’ को मोबाइलबाट फोन संवाद गरेका हुन् ।
प्रचण्ड पत्नी सीताको स्वास्थ्य अवस्था बुझ्न पुगेका देउवाले प्रचण्डकै मोबाइलबाट फोन संवाद गरेका हुन् । फोन संवादका क्रममा देउवाले ढुक्क भएर उपचार गर्न खनाललाई आग्रह गरेका छन् । ‘तपाईं ढुक्कले उपचारमा लाग्नुस् । तपाईंको उपचार खर्च सबै सरकारले व्यहोर्छ’, देउवाको भनाइ उद्धृत गर्दै स्रोतले भन्यो, ‘तपाईं निको भएर फर्किनु होला, उपचारका लागि कुनै कमी हुन नदिने वचन दिन्छु ।’
खनालको मिर्गौलामा समस्या भएपछि थापाथलीस्थित नर्भिक अस्पतालमा उपचारका लागि भर्ना भएका थिए । तर त्यहाँ अवस्था झन जटिल भएपछि उनलाई असार सुरुमा उपचारका लागि दिल्ली लगिएको हो । दिल्लीमा उपचाररत खनालको सबै उपचार खर्च यसअघि एमाले र तत्कालीन केपी ओली नेतृत्वको सरकारले गर्ने घोषणा गरेका थिए । तर त्यसबेला नेपाली कांग्रेसका नेता गगन थापासहितले सरकारको निर्णयको चर्को विरोध गरेका थिए ।
नेपाली कांग्रेसका नेता गगन थापाले राज्यको ढुकुटीबाट विदेशमा उपचार गर्ने कसैलाई पनि रकम निकाशा गर्न नमिल्ने बताएका थिए ।
भारतको एपोलो अस्पतालमा उपचार गराएका नेकपा एमाले नेता तथा पूर्व प्रधानमन्त्री झलनाथ खनालको उपचार खर्च सरकारले बेहोर्ने निर्णय सार्वजनिक भएपछि पूर्व स्वास्थ्यमन्त्रीसमेत रहेका नेता गगनले कुनै पनि व्यक्तिलाई उपचारका लागि रकम निकासा गर्नु कानुन विपरित हुने बताएका थिए । अहिले नेपाली काँग्रेसकै सभापति प्रधानमन्त्रीको कुर्सीमा छन् । देउवाको अभिव्यक्ति सार्वजनिक भएपछि यस विषयमा थापा बोल्छन् वा चुप लागेर बस्छन् त्यो भने हेर्न बाँकी नै छ ।
