नेकपा एमालेले प्रधानमन्त्री शेरबहादुर देउवालाई जस्तोसुकै परिस्थितिमा पनि समर्थन नगर्ने निर्णय गरेको छ ।
आज बसेको स्थायी कमिटी बैठकले यो निर्णय गरेको हो । बैठकपछि एमाले प्रवक्ता प्रदीप कुमार ज्ञवालीले देउवालाई विश्वासको मत दिने नेताहरु नेकपा एमालेमा नरहने बताए ।
उनले आज विहान भएको भेटमा माधव नेपालले आफू एक्लोले भएपनि पक्षमा मतदान गर्ने बताए सगै एमालेको स्थायी कमिटीले यस्तो निणर्य गरेको बताए ।
सर्वोच्चको परमादेशपछि देउवा असार २९ गते प्रधानमन्त्री नियुक्त भएका थिए । प्रधानमन्त्री नियुक्त भएको एक महिनाभित्र संसदबाट विश्वासको मत लिनुपर्ने व्यवस्था छ ।
देउवाले प्रधानमन्त्री नियुक्त भएको एक हप्ताभित्र विश्वासको मत लिन लागेका हुन् ।
२६४ सदस्य रहेको प्रतिनिधि सभामा बहुमतको लागि १३३ मतको आवश्यकता पर्दछ । काँग्रेसको ६३ र माओवादीको (सभामुख बाहेक) ४८ जना जोड्दा १११ पुग्छ । जसपाको ३२ जनामा यादव समूहका भएका कम्तिमा १६ जनाले देउवाको पक्षमा मतदान दिँदा १२७ पुग्छ ।
माधव समूहबाट ६ जनाले देउवालाई विश्वासको मत दिएको खण्डमा देउवा सरकारले बाँकी अवधिसम्म सरकार चलाउन पाउँछ ।
