जनता समाजवादी पार्टी (जसपा) अध्यक्ष महन्थ ठाकुर पक्षका पाँच सांसद अर्का अध्यक्ष उपेन्द्र यादव पक्षतिर लागेका छन्।
ठाकुर पक्ष छाडेर यादव पक्षमा लागेका सासंदहरु अमृता अग्रहरी, नरमाया ढकाल, रानी मण्डल, प्रमोद साह र रूही नाथ यादव हुन् । यसअघि उनीहरू ठाकुर पक्षमा लागेका थिए। उनीहरू अहिले बालकुमारीस्थित संसदीय दलको अनौपचारिक बैठकमा सहभागी भएको जसपा यादव पक्षले बतायो । पुनर्स्थापित प्रतिनिधिसभाको अधिवेशन सुरु हुन लागेको अघिल्लो दिन अध्यक्ष यादवले संसदीय दलको बैठक बोलाएका हुन्।
उनीहरूसहित अब उपेन्द्र यादव पक्षमा १७ सांसद छन्। जसपामा लागेका प्रमोद साहबाहेक अरू समानुपातिक सांसद हुन्। साह भने सर्लाहीबाट निर्वाचित प्रतिनिधिसभा सांसद हुन्। उनी यसअघि पनि संसद विघटनको विपक्षमा उभिएका थिए। उनी महन्थ ठाकुरले बोलाएको बैठकमा उपस्थित थिएनन्।
यसअघि शुक्रवार सिंहदरबारस्थित संसदीय दलको कार्यालयमा महन्थ पक्षको संसदीय दलको बैठक बसेको थियो। बैठकमा राजकिशोर यादव, प्रमोद साह, अमृता अग्रहरी, रानी मण्डल, रूही नाथ यादव र नरमाया ढकाल अनुपस्थित भएका थिए।
पछिल्लो समय महन्थ पक्ष एमाले अध्यक्ष केपी ओली नेतृत्वको सरकारमा सहभागी हुँदा मन्त्री नबनाइएपछि यी सांसदहरू असन्तुष्ट बनेको बताइएको छ ।