कैलालीको गोदावरी नगरपालिका स्थित अत्तरिया आसपासको क्षेत्र जलमग्न भएको छ ।
नगरपालिकाको वडा नं १ र ४ मा बुधबार रातिदेखि परेको अविरल वर्षाका कारण दर्जनौँ घर डुबानमा परेका हुन् ।
भालु खोलाको बाढीले उत्तर वनखेतका चार घर र बास्कोटाका १० घर डुबानमा परेको प्रहरीले जनाएको छ ।
इलाका प्रहरी कार्यालय मालाखेतीका प्रहरी निरीक्षक उमेश चन्दका अनुसार मनहरा खोलाको बाढी पनि बस्तीमा पसेको छ ।
उनले गेटा मेडिकल कलेज आसपासको क्षेत्रमा रहेका घरमा पानी पसेको बताए ।
गोदावरी–२ को तेघरीमा पनि घरमा पानी पसेको छ भने अत्तरिया बजार जलमग्न बनेको छ ।
कैलालीका नदीमा पानीको सतह बढ्दा खतराको तह पार गरेको बाढी पूर्वानुमान महाशाखाले जनाएको छ ।