नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई उनकै निवास खुमलटारमा भेट्न पुगेका नेकपा महासचिव नेत्रविक्रम चन्द ‘विप्लव’ले ओली सरकारसँग गरिएको ३ बुँदे सहमति कार्यन्वयन हुने आश्वासन पाएका छन् ।
राष्ट्रिय सभा गृहमा सरकार पक्ष र विप्लव समूहबीच भएको ३ बुँदे सहमति कार्यान्वयनका विषयका सन्दर्भमा कुराकानी गर्न विप्लव बुधबार प्रचण्ड निवास खुमलटार पुगेका हुन् । दाहाललाई भेट्न चन्दसहित नेकपा नेता धर्मेन्द्र बास्तोला पनि खुमलटार पुगेको तस्विर प्रचण्डको स्वकीय सचिव गंगा दाहालले सामाजिक सञ्जालमार्फत सार्वजनिक गरेकि थिइन् ।
भेटमा प्रचण्डले ओली सरकारमा भएका ती ३ बुँदे सहमतिहरु कार्यान्वयन हुने बताएका छन् ।
ओली सरकार रहँदा शान्ति प्रक्रियामा हस्ताक्षर गरेका उनले ओली सरकारको बहिर्गमनसँगै अध्यक्ष प्रचण्डलाई भेट्नु अर्थपूर्ण मानिएको छ । ओली सरकारमा शान्ति प्रक्रियामा आउँदा ३ बुँदे सहमति भएको थियो ।
उक्त सहमतिका बुँदामा आफ्ना नेता कार्यकर्ता रिहा गर्न सर्त राखिएको थियो । तर, अहिलेसम्म विप्लव समूहका नेता कार्यकर्ता रिहा भइसकेका छैनन् ।
दाहाल-चन्दबीच लामो समयको अन्तरालपछि औपचारिक रुपमा भेट भएको हो । अराजक गतिविधि गरेको भन्दै नेकपालाई प्रतिबन्ध लगाएपछि चन्द अर्धभूमिगत बनेका थिए । उनी ०७७ फागुन २१ गते राष्ट्रिय सभागृहमा सरकारसँग पार्टीको तर्फबाट ३ बुँदे सम्झौता भएपछि खुला राजनीतिमा आएका हुन् ।
