सरकारले ल्याएको बजेटको विरोधमा एमालेले संसद अवरुद्ध गरेको छ । आइतबारदेखि सुरु भएको बैठकमा रकमान्तरको विरोध गर्दै अवरोध गर्यो । पछि त्यसमा सहमति जुट्यो । संसदीय अनुगमन समिति गठन गर्ने सहमति पछि संसद सूचारु भयो ।
सोमबार टेबुल गरिएको विनियोजन विधेयकमाथी आज छलफलको कार्यसूची थियो । सुरुदेखि नै अवरोध गरिरहेको एमालेले सदन चल्नै दिएन । लगातार तीन पटक सदन अवरुद्ध भएपछि मार्शल लगाएर सदन चलाईयो ।
तर एमाले सांसदहरु बसिरहेको कुर्ची छोडेर संसदको रोष्टम अघि नाराबाजीमा उत्रिए । त्यतिमा मात्रै रोकिएनन्, केहिबेर सत्तापक्ष र प्रतिपक्षी सांसदबीच भनाभन भयो । पुर्व मन्त्री तथा एमाले सांसद रामशरण बस्नेतले मन्त्रीको टेवुल नै नै फालिदिए । बस्नेत यसअघिको सरकारमा भौतिक पूर्वाधार विकास मन्त्री थिए ।
्एमालेको अवरोध बीच पनि गण्डकी प्रदेश सरकारको आगामी आर्थिक वर्ष २०७८/७९ का लागि ल्याएको बजेट बहुमतले पारित भएको छ ।
सभामुख नेत्रनाथ अधिकारीले विनियोजन विधेयक प्रस्तुत गर्न मुख्यमन्त्री कृष्णचन्द्र नेपाली पोखरेललाई समय दिएपछि प्रतिपक्षी सांसदहरु आक्रोशति बनेका थिए । मार्सल लगाएर विनियोजन विधेयक पास गराइएपछि एमाले सांसदहरुले सदन छाडेका थिए ।
विनियोजन विधेयक बैठकमा निर्णयार्थ पेश हुँदा नेकपा एमालेका सांसद सदनमा थिएनन् । मुख्यमन्त्री पोखरेलले निर्णयार्थ पेश गरेको बजेट नेपाली काँग्रेस, नेकपा माओवादी केन्द्र, राष्ट्रिय जनमोर्चा र स्वतन्त्र सांसद राजीव गुरुङको समर्थनमा आर्थिक वर्ष २०७८/७९ विनियोजन विधेयक बहुमतले पास भएको हो ।
आफ्नो कुरा नसुनेपछि एमाले सांसदहरु केहिबेर नाराबाजी गरेर सदनबाट बाहिरिएका थिए । आफ्नो सरकारको पालामा ल्याएका राम्रा योजनाको बजेट काटेकोमा उनीहरुले आपत्ति जनाएका हुन् ।
