सोमबार मृत भेटिएकी उच्च अदालत विराटनगर, इलाम इजलासको परिसरभित्र मृत फेला परेकी महिलाको हत्या भएको पुष्टि भएको छ ।
सोलुखुम्बु, सल्यान गाउँपालिका घर भई इलाम नगरपालिका–७ मा भाडामा बसोबास गरी सोही कार्यालयमा कार्यरत ४८ वर्षीया बिमलादेवी निरौला पराजुलीको हत्या भएको पुष्टि भएको हो ।
सोमबार बिहान ७ बजे उनी कार्यालय परिसरमा मृत फेला परेकी थिइन् । स्थानीयको सूचना पाएपछि जिल्ला प्रहरी कार्यालय इलामबाट प्रहरी उपरीक्षक महेन्द्रकुमार श्रेष्ठसहितको प्रहरी टोलीले घटनाको बारेमा अनुसन्धान थालेको थियो ।
थप अनुसन्धानको लागि सङ्घीय प्रहरी इकाई धरानबाट तालिमप्राप्त कुकुरसहितको विशेषज्ञ टोली झिकाई अनुसन्धान गर्ने क्रममा सोही कार्यालयमा सुरक्षा गार्डको रूपमा कार्यरत ३५ वर्षीय युवराज बानियाको संग्लग्नता रहेको देखिएको थियो ।
संलग्ना रहेको देखिएपछि बानियाँलाई पक्राउ गरी सोधपुछ गर्दा उनले उक्त घटनामा आफ्नो संग्लग्नता रहेको स्वीकार गरेका थिए । घटना सम्बन्धमा थप अनुसन्धान भइरहेको जिल्ला प्रहरी कार्यालय इलामले जनाएको छ ।
अभियुक्तले आरोप स्वीकार गरेपछि उनीउपर कर्तव्य ज्यान मुद्दामा अनुसन्धान अगाडि बढाउन जिल्ला अदालतको आदेशमा पाँच दिनका लागि हिरासतमा राखिएको प्रहरीले जनाएको छ । २०७३ सालदेखि उच्च अदालत इलाम इजलासमा कार्यरत अभियुक्त बानियाँले न्यायाधीश यादव बिदामा बसेको अवस्थामा अदालतको क्वार्टरमै बस्दै आएकी पराजुलीको हत्या गरेका हुन् ।