सर्वोच्च अदालतको परमादेशअनुसार राष्ट्रपति कार्यालयले आज नेपाली काँग्रेसका सभापति शेरबहादुर देउवालाई प्रधानमन्त्री पदमा नियुक्ति गर्ने र शपथग्रहण गराउने तयारी सुरु गरेको छ।
राष्ट्रपति कार्यालयका एक अधिकारीका अनुसार मङ्गलवार ५ बजेभित्रै काँग्रेस सभापति देउवालाई प्रधानमन्त्री पदमा नियुक्त गर्ने र शपथ गराउने तयारी भइरहेको छ। देउवा यसअघि चार पटकसम्म प्रधानमन्त्री बनिसकेका छन् । प्रधानमन्त्रीको रुपमा उनको यो पाँचौ इनिङ हो ।
देउवाले आजै सानो आकारको मन्त्रिपरिषद् बनाउने तयारी गरेका छन् । काँग्रेस, माओवादी केन्द्र र जनता समाजवादी पार्टीको उपेन्द्र यादव समूहबाट सानो आकारको मन्त्रिपरिषद् बनाउने तयारी भएको काँग्रेस नेता बालकृष्ण खाँडले बताए । काँग्रेसले अर्थ र स्वास्थ्य, जसपाले परराष्ट्र र माओवादीले गृह मन्त्रालय लिने लगभग सहमत्ति भएको छ ।
नेपाली काँग्रेसबाट पूर्व अर्थमन्त्री ज्ञानेन्द्र कार्की, मीनेन्द्र रिजालदेखि गगन थापासम्मको नाम मन्त्री बन्नेको चर्चामा ल्याइएको छ। मन्त्री बन्ने लाइनमा बालकृष्ण खाँडको नाम पनि अगाडि आइरहेको छ, यद्यपि मन्त्रीहरूको नाम सभापति देउवाले फाइनल गर्नेछन्। कार्की वा खाडलाई अर्थ र थापालाई स्वास्थ्य मन्त्रालयको जिम्मेवारी दिने तयारी भैरहेको नेपाली काँग्रेसको उच्च स्रोतले केटिएम दैनिकलाई बताएको छ ।
माओवादी केन्द्रका नेताहरूका अनुसार माओवादीका तर्फबाट मन्त्री छान्ने जिम्मा पार्टीले अध्यक्ष पुष्पकमल दाहाल प्रचण्डलाई दिएको छ। शीर्ष नेताकै नेतृत्वमा सरकारमा सामेल हुनेबारे माओवादी भित्र छलफल सुरु भएको छ। त्यसका लागि नारायणकाजी श्रेष्ठ, कृष्णबहादुर महरा र जनार्दन शर्माको नाम चर्चामा छ। गृहमन्त्रीमा जनार्दन शर्मालाई लैजाने तयारी भैरहेको प्रचण्ड निकट एक नेताले केटिएम दैनिकलाई बताए ।
त्यस्तै जसपाबाट अध्यक्ष उपेन्द्र यादव नै मन्त्री बन्ने पक्का जस्तै भएको छ ।