प्रदेश नं १ का मुख्यमन्त्री शेरधन राईले प्रतिनिधिसभा पुनर्स्थापना गर्ने सर्वोच्च अदालतको फैसलाले मुलुक गम्भीर सङ्कट र अस्थिरतामा धकेलिएको बताएका छन् ।
सोमबार सर्वोच्चले संसद् पुनर्स्थापना गर्दै दुई दिनभित्र नेपाली काङ्ग्रेसका सभापति शेरबहादुर देउवालाई प्रधानमन्त्री बनाउन परमादेश जारी गरेपछि सामाजिक सञ्जालमार्फत प्रतिक्रिया दिँदै मुख्यमन्त्री राईले यस्तो बताएका हुन् ।
‘सर्वाेच्चको फैसलाले मुलुक गम्भीर सङ्कट र अस्थिरतामा धकेलियो’, उनले लेखेका छन्, ‘संसदीय व्यवस्था र दलीय प्रणालीको मूल मर्म मै नाङ्गो प्रहार ।’
आज प्रधानन्यायाधीश चोलेन्द्रशम्शेर जबरा तथा न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईको संवैधानिक इजलासले संसद् पुनर्स्थापना गर्ने फैसला सुनाएको हो ।
गत जेठ ८ गते मन्त्रिपरिषद्को सिफारिसमा प्रतिनिधिसभा विघटन गरी आगामी कात्तिक २६ र मङ्सिर ३ गते मध्यावधि निर्वाचन तोक्ने गरी राष्ट्रपतिको सोही दिनको निर्णय बदर गरेर असंवैधानिक र गैरकानूनी घोषणा गर्ने माग ती निवेदनमा गरिएको थियो ।
