सुदूरपश्चिम प्रदेशको मुख्यमन्त्री तथा मन्त्री परिषद् कार्यालय बाहिर भएको झडप अन्तत मिलापत्रमा टुङ्गिएको छ ।
वडा प्रहरी कार्यालय धनगढीले अब झगडा नगर्ने सहमति गराएर मिलापत्र गराएको बादी उत्थान समिति कि अध्यक्ष रमा बादीले बताइन् ।
उनले भनिन्, ‘आजबाट यो बिषयमा झगडा गर्ने छैनौँ , दुबै पक्ष मिलेर काम गर्ने छौँ भनेर कागज भयो ।’
जिल्ला प्रहरी कार्यालय कैलालीले पनि उनीहरुले झगडा नगर्ने प्रतिबद्धता गरेर गएको बताएको छ ।
‘वडाबाटै उनीहरुको सहमति गरेर पठाइएको छ’ जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतिक बिष्टले बताए ।
आइतबार बादी उत्थान समिति कि अध्यक्ष रमा बादी लगायतको टोलीले मुख्यमन्त्री त्रिलोचन भट्टलाई भेटेर ज्ञापन पत्र बुझाएका थिए ।
मिठु बादी नेतृत्वको बादी समुदायका नागरिक पनि मुख्यमन्त्री कार्यालय बाहिर आएका थिए ।
तर, उनीहरुले आफूलाई मुख्यमन्त्रीसँग भेट गर्न नदिएको आरोप लगाए ।रमा बादी नेतृत्वको समूहले बादी समुदायको नागरिकको नाममा यस अघि पनि बिभिन्न कार्यक्रम गर्दै आर्थिक हिनामिना गरेको भन्दै मिठु बादी नेतृत्वको बादी समुदायले विरोध गरेपछि मुख्यमन्त्री कार्यालय अघि हात हालाहालको अवस्था सृजना भएको हो।
