कुनै पनि नारीले आफूलाई तबमात्र पूर्ण भएको महसुस गर्छे, जब ऊ आमा बन्छे । यसैले त आमा बन्ने कुरा सबै महिलाको लागि जीवनको ठूलो खुसी हो ।
अभिनेत्री प्रियंका कार्कीले पनि अहिले आमा बन्न लाग्दाको खुसी महशुस गरिरहेकी छन् । अभिनेता आयुष्मान देशराज जोशीसँग अघिल्लो वर्ष धुमधामसँग विवाह गरेकी उनी आफ्नो पहिलो सन्तानलाई जन्म दिन आतुर छिन् ।
आफू गर्भवती भएको खबर सार्वजनिक गरेपछि प्रियंकाले दिनहुँ आफ्नो बेबी बम्पसहितका तस्विरहरु सामाजिक सञ्जालमा पोस्ट गरिरहेकी छन् । केही समयअगाडि उनले आफू र आफ्नो पेटमा बच्चाको आकार बनाएर गर्भको भ्रूणलाई पाइपबाट जुस पलाएको तस्विर सामाजिक सञ्जालमा शेयर गरेपछि निकै भाइरल भएको थियो । यो तस्विरका कारण उनको चर्चा र आलोचना दुवै भयो ।
अहिले प्रियंका साथी र परिवारले आयोजना गरेको ‘बेबी सावर’ मा रमाइरहेकी छन् । गएको हप्ता उनका नजिकका साथीहरुले मिलेर ‘बेबी सावर’ आयोजना गरेका थिए । शनिवार आयुष्मानले पनि प्रियंकाको लागि काठमाडौंको एक पाँचतारे होटलमा ‘बेबी सावर’ पार्टीको आयोजना गरे । जसमा दुवै पक्षका परिवारका सदस्यदेखि नजिकका व्यक्तिहरुको उल्लेख उपस्थिति रहेको थियो ।
आइतवार प्रियंकाले इन्स्टामा उत्कृष्ट ‘बेबी सावर’ को आयोजना गरेकोमा श्रीमानलाई धन्यवाद दिँदै यो आफूहरुका लागि सर्वश्रेष्ठ वर्ष रहेको बताएकी छन् । उनले लेखेकी छन्, ‘हाम्रो चमत्कार र सानो राम्रो फूललाई स्वागत गर्न अब मबाट प्रतिक्षा हुन सक्दैन । तिम्रो (आयुष्मान) साथका कारण मेरो गर्भमा बढिरहेको जीवनलाई हामीले प्रेम, खुसी र नयाँ सुरुवातका लागि तयार गरेका छौं ।’