अमेरिकाले नेपाललाई १५ लाख डोज जोन्सन एन्ड जोन्सन खोप उपलब्ध गराउने भएको छ । आजै बेलायती समाचार संस्था रोयटर्सले अमेरिकी राष्ट्रपति कार्यालय ह्वाइटहाउसका अधिकारीलाई उद्धृत गर्दै आज (शुक्रवार) अमेरिकाले नेपाललाई १५ लाख र भुटानलाई मोडेर्ना कम्पनीले बनाएको ५ लाख डोज खोप पठाउन लागेको समाचार प्रकाशन गरेको थियो।
उक्त खोप कहिले नेपाल आइपुग्छ भन्नेबारेमा कतैबाट पनि पुष्टि हुन सकेको छैन । अमेरिकाले यसअघि नै नेपाललाई चाँडै नै खोप उपलब्ध गराउन लागि परेको बताएको थियो । यसअघि नेपालस्थित अमेरिकी दूतावासले खोप ल्याउनका लागि आवश्यक प्रक्रियामा लागि रहेको जानकारी दिएको थियो । जोन्सन एण्ड जोन्सन कम्पनीको खोप एक मात्रा लगाए हुन्छ ।
काठमाडौँस्थित अमेरिकी राजदूतावासले उक्त खोप नेपाली जनतालाई अमेरिकी जनताका तर्फबाट उपहार भएको जनाएको छ। राजदूतावासकी प्रवक्ता एना रिचे एलेनले अमेरिकी जनताका तर्फबाट नेपाली जनतालाई उपहारस्वरूप जोन्सन एन्ड जोन्सन कम्पनीले बनाएको १५ लाख डोज खोप दिन लागेको बताइन्।
पछिल्ला दिनहरूमा विभिन्न देशहरूले खोप कूटनीति अगाडी बढाइरहेका छन् । चीनले विश्वका धेरै देशहरूमा खोप निर्यात गरेसँगै अमेरिकाले पनि खोप निर्यात अगाडि बढाइरहेको छ ।
मन्त्रालयले दुई दिन अघि नै जोन्सन एण्ड जोन्सनको खोपलाई प्रयोगको अनुमति दिनका लागि औषधि व्यवस्था विभागलाई चिठी पठाएको थियो । यता खोप आउने निश्चित भएपछि स्वास्थ्य सेवा विभागका अधिकारीहरू भने अब खोप कहिले देखि सुरु गर्ने भन्ने योजना बनाउन व्यस्त भएका छन् । आजै चीनबाट ८ लाख डोज भेरोसेल खोप काठमाडौँ आइपुगेको छ ।