दलितलाई दलित कोटा दिँदा, तल्लो जात भनेर हेपिनु पर्ने, महिलालाई महिला कोटा दिँदा, बलात्कृत हुन पर्ने, जनजातिलाई जनजाति कोटा दिँदा, मधेसको भए पनि धोती को उपनामले चिनिनु पर्ने ।
अपाङ्गलाई अपाङ्ग कोटा दिँदा, सरकारले अपाङ्ग मैत्री समाज नबनाएका कारण हेपिनु बस्नु पर्ने, पिछडिएकोलाई पिछडिएको कोटा दिँदा पाखेको उपनामले चिनिनु पर्ने, एउटा मानवले अर्को मानव बाट आखिर कहले सम्म अपमान सहेर बस्नु पर्ने?
यो संसार धनी हुनेहरूको मात्रै हो? सर्वसाधारण जनताले सहज तरिकाले बाच्न र सास फेर्न नपाउने ?
हाम्रो मानसिकतामा परिवर्तन कहिले आउने?
विश्वका विकसित देशमा कुकुरले चन्द्रमा देखि सके तिमीहरूले राम्रोसँग कोसी, कर्णाली देख्न पाएका छैनौँ । विश्व आधुनिक युगमा प्रवेश गरिसक्यो तिमी त्यहीँ रुढीवादी परम्परालाई अँगालेर बसिरहेका छौ?
कस्तो जातलाई दलित भन्छ? रगत कालो, हरियो, सेतो, पहेँलो छ? अनुहार, टाउको, हात, खुट्टा उल्टा छन्? उनीहरूले कपडा लगाउँदैनन्? कि उनीहरूले बोल्ने भाषामा दलित लेखेको छ? सबैले बोल्ने भाषा, लगाउने लुगा एउटै हो, सबैको रगत रातो नै छ । विश्वमा मन्छेको जात दुई वटा हो, एक महिला अर्को पुरुष । अहिलेको अवस्था हेर्दा नामको पछाडि लेख्ने थर परिवर्तन गर्न मुस्किल छ । हामी जुन थरको हौँ त्यो थर लेख्न र भन्न नहिच्कीचाउ भन्ने मेरो भनाइ हो ।
यो आधुनिक संसारमा जातको पछि लाग्नेहरूले न आफू सुध्रिन्छन् न अरूलाई सुध्रिन दिन्छ नत समाज र देश नै सुधार्न सक्छन् ।
अहिलेको मानव जाति यति धेरै स्वार्थी भइसक्यो की उसले आफ्नो स्वार्थको लागि मात्र त्यो भाषा प्रयोग गर्छ, स्वार्थ पुरा भएको दिन देखि त्यो भाषा बोल्न छोड्छ र उ परिवर्तन भएर अर्कै संसारमा पुगिसकेको हुन्छ । यहाँ मान्छे समय अनुसारको भाषा, हिँड्ने चाल, लवाइ खुवाइ परिवर्तन गर्छन् ।
अबको युवा पङ्क्ति यस्ता अन्ध विश्वासको पछि नलागेर, जुनसुकै जात तथा धर्मको भए पनि एउटै मन र मुटु बनाएर अगाडी बढ्यो भने समाज अवश्य पनि परिवर्तन हुने छ । हामी सबैले चाहेको सोच्छ, शान्त, समृद्ध नेपाल भएको हेर्ने रहर सबैलाई छ ।
खड्का वैदेशिक रोजगारीको सिलसिलामा अहिले साइप्रसमा छन् । यो उनको निजी विचार हो ।
