प्रेस काउन्सिल नेपालले ४ वटा अनलाइनलाई एक वर्षको लागि कालोसूचीमा राखेको छ । यसरी कालोसूचीमा पर्नेमा इहिमालयटाइम्स डटकम (ehimalayatimes.com), वीरगञ्जसिटी डटकम (birgunjcity.com), एनआरएनखबर डटकम (nrnkhabar.com), कोशीपाटी डटकम (koshipati.com) रहेको काउन्सिलले जारी गरेको विज्ञप्तीमा उल्लेख छ ।
काउन्सिलले १५ दिनको तुलनामा १३ वटा अनलाइनमा स्वअनुगमन गर्दा ८ वटालाई ध्यानाकर्षण, ४ वटालाई सचेत, एक सञ्चारकर्मीलाई सचेत र एक सञ्चार विज्ञलाई ध्यानाकर्षणको लागि पत्र काटेको छ ।
काउन्सिलले विहीबार विज्ञप्ति जारी गर्दै सेतोपाटी डटकम (setopati.com), नेपालआज डटकम (nepalaja.com), देशसञ्चार डटकम (deshsanchar.com), , जनता टाइम्स डटकम (janatatimes.com), रिपोर्टस नेपाल डटकम (www.repotersnepal.com), दैनिक नेपाल न्यूज डटकम (www.dainiknewsnepal.com), सफल खबर लगायत १३ वटा अनलाइन र सञ्चार विज्ञ भानुभक्त आचार्यलाई लिखित पत्र काटेको जनाएको छ ।
काउन्सिलले पछिल्लो पन्ध्र दिनमा १५ वटा वेबपोर्टल नेपालभित्र सम्प्रेषण हुन नसक्ने व्यवस्थाका लागि नेपाल दूरसञ्चार प्राधिकरणलाई पत्राचार गरेको छ । यसैबिच पछिल्लो समय रुपा सुनवार र सरस्वती प्रधानको सन्दर्भमा विभिन्न सञ्चारमाध्यम र सामाजिक सञ्जालमा सम्प्रेषित समाचार तथा समाचार सामग्रीप्रति समेत प्रेस काउन्सिल नेपालको ध्यानाकर्षण भएको छ ।