राष्ट्रिय महिला फुटबल टोलीकी स्ट्राइकर साबित्रा भण्डारी ‘साम्बा’ घुँडाको शल्यक्रिया गर्न कतार जाने भएकी छन् । अखिल नेपाल फुटबल सङ्घ (एन्फा) ले सावित्रा शनिबार उपचारका लागि कतार जाने जनाएको हो ।
एन्फाले मङ्गलबार विज्ञप्ति जारी गर्दै कतार फुटबल एसोसियसनको सहयोगमा सावित्राको उपचार दोहास्थित अस्पेटार अस्पतालमा हुने जनाएको छ । एन्फाले सावित्राको उपचारमा सहयोग गर्नका लागि कतारलाई पत्र पठाएको थियो ।
महिला लिग खेल्ने क्रममा एपिएफकी स्ट्राइकर साम्बाले घुँडामा चोट बोकेकी थिइन् । नेपाल पुलिसविरुद्धको खेलका क्रममा उनको दाँया खुट्टाको एन्टेरिएर क्रुसिएट लिगामेन्ट (एसिएल) च्यातिएको थियो ।
त्यसअघि पुरुष खेलाडी विमल घर्तिमगर र विक्रम लामाले पनि सोही ठाँउमा शल्यक्रिया गरेका थिए ।