प्रधानमन्त्री केपी शर्मा ओलीले सरकारलाई जसरी पनि असफल बनाउने नियतकासाथ केही समूहहरु लागि परेको र काम गर्न नदिनका लागि नै मुद्दामा नै अल्झाउने जालझेल भइरहेको बताएका छन् ।
कोभिडसँग लामो समय जुध्नु परेको अवस्था रहेको जनाउँदै यस्तो अवस्थामा पनि विकास निर्माणका कामहरु अघि बढाएको उनको भनाइ थियो ।
गौरादह नगरपालिका वडा नं. ४ डोरामारी माध्यमिक विद्यालय भवनको मंगलबार भर्चुअल माध्यमबाट शिलान्यास गर्दै प्रधानमन्त्री ओलीले यस्तो बताएका हुन् ।
यसबीचमा राजनीतिक असहयोग, खुट्टा तान्ने र देशमा विकास एवं उन्नती देख्न नचाहने प्रवृतिले काम गर्न नदिने परिस्थिति सिर्जना गरिएको छ, ओलीले भने ।
कहिले के नाममा भाँजो हाल्ने त कहिले के नाममा भाँजो हाँल्ने कार्य भइरहेको छ, ओलीले भने, ‘देशलाई प्रतिगमन तर्फ लैजान खोज्ने, देशलाई अग्रगतिको बाटोमा जान दिन नखोज्ने, लोकतान्त्रिक प्रकृयामा जान नदिने, सरकारलाई काम गर्न नदिने चौतर्फी प्रयासहरु भइरहेको छ।’