सर्वोच्च अदालतले मन्त्रिपरिषद् विस्तारको निर्णय तत्काल कार्यान्वयन नगर्न अन्तरिम आदेश गरेको छ । अदालतको उक्त आदेशसँगै २०* मन्त्री पद खारेज भएको छ ।
वरिष्ठ अधिवक्ता दिनेश त्रिपाठीले प्रतिनिधिसभा विघटन र निर्वाचन घोषणा भएको अवस्थामा गरिएको मन्त्रिपरिषद विस्तारको निर्णयविरुद्ध दायर गरेको रिटमा प्रधानन्यायाधीश चोलेन्द्रशमशेर राणा र न्यायाधीश प्रकाशकुमार ढुंगानाको संयुक्त इजलासले मन्त्रिपरिषद् विस्तारको निर्णय तत्काल कार्यान्वयन नगर्न अन्तरिम आदेश दिएको हो ।
प्रधानमन्त्री केपी शर्मा ओलीले प्रतिनिधिसभा विघटनलगत्तै माओवादी छाडेर एमाले भएका मन्त्रीहरुलाई सपथ गराएका थिए भने गत जेठ २१ गते पुनः मन्त्रिपरिषद विस्तार गरिएको थियो । जसपासमेत सरकारमा सहभागि भएपछि ३ उपप्रधानमन्त्रीसहित १२ मन्त्री र २ राज्यमन्त्रीले जेठ २१ मा राष्ट्रपति विद्यादेवी भण्डारीबाट शपथ लिएका थिए । त्यस्तै गत जेठ २७ गते गृहमन्त्री खगराज अधिकारीसहित ७ मन्त्रीले सपथ लिएका थिए ।
सर्वोच्चको आदेशबाट उपप्रधानमन्त्रीहरू विष्णु पौडेल, रघुवीर महासेठ र राजेन्द्र महतो, १५ जना मन्त्री र ३ जना राज्यमन्त्री जिम्मेवारीमुक्त भएका छन् । अब सरकारमा प्रधानमन्त्री ओली, उपप्रधानमन्त्री विष्णुप्रसाद पौडेल, शिक्षामन्त्री कृष्णगोपाल श्रेष्ठ, कानूनमन्त्री लिलानाथ श्रेष्ठ र भौतिक पूर्वाधार मन्त्री वसन्तकुमार नेम्वाङमात्रै बहाल रहेका छन् ।
पछिल्लो पटक नियुक्त गरिएका दुई उप्रधानमन्त्रीको पदै जाँदा पौडेलको उपप्रधानमन्त्री पद भने जोगिएको छ । अदालतको आदेशमा पौडेललाई उप्रधानमन्त्री नै सम्बोधन गरिएको छ ।
जिम्मेवारीमुक्त भएका मन्त्रीहरू
१) नामथर : रघुबीर महासेठ
यसअगाडी दिइएको पद : उपप्रधानमन्त्री परराष्ट्र
२) राजेन्द्र महतो
यसअगाडी दिइएको पद : उपप्रधानमन्त्री शहरी विकास
३) खगराज अधिकारी
यसअगाडी दिइएको पद : मन्त्री गृह
४) शरतसिंह भण्डारी
यसअगाडी दिइएको पद : मन्त्री ऊर्जा, जलस्रोत तथा सिंचाई
५) अनिलकुमार झा
यसअगाडी दिइएको पद : मन्त्री खानेपानी
६) शेरबहादुर तामाङ
यसअगाडी दिइएको पद : मन्त्री स्वास्थ्य तथा जनसङ्ख्या
७) राजकिशोर यादव
यसअगाडी दिइएको पद :मन्त्री उद्योग, बाणिज्य तथा आपूर्ति
८) लक्ष्मणलाल कर्ण
यसअगाडी दिइएको पद :मन्त्री भूमि व्यवस्था, सहकारी तथा गरिबी निवारण
९) नैनकला थापा
यसअगाडी दिइएको पद : मन्त्री सञ्चार तथा सूचना प्रविधि
१०) ज्वालाकुमारी साह
यसअगाडी दिइएको पद : मन्त्री कृषि तथा पशुपन्छी विकास
११) बिमलप्रसाद वास्तव
यसअगाडी दिइएको पद : मन्त्री श्रम, रोजगार तथा सामाजिक सुरक्षा
१२) उमाशंकर अरगरिया
यसअगाडी दिइएको पद :मन्त्री संस्कृति, पर्यटन तथा नागरिक उड्डयन
१३) चन्दा चौधरी
यसअगाडी दिइएको पद : मन्त्री महिला, बालबालिका तथा ज्येष्ठ नागरिक
१४) एकवाल मियाँ
यसअगाडी दिइएको पद :मन्त्री युवा तथा खेलकुद
१५) नारद मुनि राना
यसअगाडी दिइएको पद : मन्त्री वन तथा वातावरण
१६) गणेशकुमार पहाडी
यसअगाडी दिइएको पद :मन्त्री सङ्घीय मामिला तथा सामान्य प्रशासन
१७) मोहन बानिया
यसअगाडी दिइएको पद : मन्त्री प्रधानमन्त्री तथा मन्त्रिपरिषद्को कार्यालय
१८) चन्द्रकान्त चौधरी
यसअगाडी दिइएको पद :राज्यमन्त्री ऊर्जा, जलस्रोत तथा सिंचाई
१९) रेणुका गुरूङ
यसअगाडी दिइएको पद : राज्यमन्त्री महिला, बालबालिका तथा ज्येष्ठ नागरिक
२०) आशाकुमारी वि.क.
यसअगाडी दिइएको पद : राज्यमन्त्री वन तथा वातावरण