अग्रपंक्तिमा खटिएर काम गरिरहेका पत्रकारका लागि कोरोना खोप उपलव्ध गराउन अन्तरिक आदेश माग गर्दै सर्वोच्चमा हालेको रिटमा आज सर्वोच्च अदालतले अन्तरिम आदेश जारी गरेको छ ।
रिटमा अन्तरिम आदेश दिँदै सर्वोच्च अदालतले पहिलो खोप लगाएका पत्रकारलाई दोस्रो र पहिलो खोप नलगाएका पत्रकारलाई पहिलो खोप उपलब्ध गराउन अन्तरिम आदेश जारी गरेको छ । अन्तरिम आदेश दिनु नपर्ने कुनै कारण आधार भएमा १५ दिनभित्र महान्यायाधिवक्ताको कार्यालयमार्फत लिखित जवाफ पेस गर्न प्रधानमन्त्री तथा मन्त्रिपरिषद्को कार्यालयलाई सर्वोच्चले निर्देशन दिएको छ ।
कोभिड १९ विरुद्धको खोप पत्रकारहरुलाई उपलव्ध गराउन स्वास्थ्य मन्त्रालयका आनाकानी गरेपछि सर्वोच्च अदालतमा रिट दायर गरिएको थियो ।
पत्रकार तथा अधिवक्ताद्वय लीलानाथ घिमिरे र बिष्णु गिरी निश्चलले यसअघि खोप लगाउन छुटेका सबै पत्रकारहरूलाई प्राथमिकताका आधारमा कोरोनाविरुद्धको खोप उपलब्ध गराउन माग राख्दै रिट दायर गरेका हुन् । यसअघि पहिलो र दोस्रो चरणको खोप अभियानमा केही पत्रकारहरूले कोरोनाको खोप लगाएको भए पनि अझै धेरै पत्रकारहरू कोरोनाविरुद्धको खोप लगाउनबाट वञ्चित रहेका छन् ।
नेपाल पत्रकार महासंघ काठमाडौं शाखाले गत जेठ २७ मा शाखासहित एसोसिएट शाखा र प्रतिष्ठान शाखाका २ हजार २ सय पत्रकारहरूका लागि स्वास्थ्य सेवा विभागका महानिर्देशकलाई पत्र लेख्दै पत्रकारहरूका लागि खोप उपलब्ध गराइदिन आग्रह गरेको थियो ।
देशका विभिन्न जिल्लाहरुमा पत्रकारहरुले खोप लगाइसक्दा पनि काठमाडौंका पत्रकारहरुले खोप लगाउन बञ्चित हुँदै आएका थिए ।