सिन्धुपाल्चोकको मेलम्ची खोलामा भीषण बाढी आएको छ । शुक्रबार साँझ साढे ८ बजेदेखि खोलाको बहाव बढ्दै गएको मेलम्ची प्रहरी कार्यालयका प्रहरी निरीक्षक टिकाराम राईले जानकारी दिए ।
प्रहरीले त्यस आसपासका जोखिमयुक्त क्षेत्रमा रहेका मानिसहरुलाई माइकिङ गरेर सुरक्षित स्थानमा सारिएको मेलम्चीमा रहेका फोटोपत्रकार सरोज बस्नेतले बताए ।
वर्षा सामान्य भएपनि बाढीको बहाव बढी मात्रामा आएको उनको भनाई छ । राती भएकाले तल कती ठूलो बाढी आएको देख्न नसकिएतापनि माथिबाट खोलामा बगेको पानीको आवाज ठूलो सुनिएको छ । भोली बिहानसम्म बाँकी रहेका घरहरुमा थप भौतिक क्षति हुन सक्छ ।
बाढी बढेकाले दाेलालघाट क्षेत्रमा पनि त्रास बढेको छ । खाेलामा लेदाेसहितकाे बाढी आएको स्थानीयबासिन्दाले जनाएका छन् । बाढी पूर्वानुमान महाशाखाले भोटेकोशीको बाढीले नदीकाे सतह पार गरेको जनाएको छ । सिन्धुपाल्चोकको बाह्रबिसे क्षेत्रमा भोटेकोशी नदीको बाढीले खतराको तह पार गरेको संकेत गर्दै सर्तक रहन आग्रह गरेको छ ।
हेलम्बु माथी थुनिएको खोला फुटेर बाढी आएको स्थानीहरुले बताएका छन् । राती भएकाले यसबारे थप विवरण प्राप्त हुन सकेको छैन ।
३ दिन अघि मेलम्ची तथा याङ्ग्री र लार्के नदीमा आएको भीषण हेलम्बु गाउँपालिका र मेलम्ची नगरपालिकामा अपुरणीय क्षती भएको छ । जिल्ला प्रशासन कार्यालय बिहीबार रातिसम्म सङ्कलन गरेको विवरणअनुसार २ चिनिया र एक भारतीय नागरिकको शव भेटिएको छ । बाढीमा परेर २० जना बेपत्ता भएका छन् भने बेपत्ता भएका ४ जना सम्पर्कमा आएका छन् ।
बाढीले १० वटा झोलुंगे पुल, ६ वटा पक्की पुल र ७ वटा ट्राउट माछामा पूर्णरुपमा क्षति गरेको छ ।
