भारतका विभिन्न राज्यबाट सुदूरपश्चिम प्रदेश प्रवेश गर्ने कञ्चनपुरको गौरीफन्टा नाका व्यवस्थित बनाइने भएको छ।
स्थानीय तह र प्रदेश सरकार मिलेर नाकालाई व्यवस्थित बनाउन लागेका हुन्। प्रदेश सरकारले स्थानीय तहसँग मिलेर नाकालाई व्यवस्थित बनाउने सुदूरपश्चिम प्रदेशको आन्तरिक मामिला तथा कानूनमन्त्री पूर्णा जोशीले बताइन्।
कोभिड–१९ को अर्को लहर आउनसक्ने सम्भावना भएकाले पूर्वसतर्कताका निम्ति स्थानीय तहसँग मिलेर प्रदेश सरकारले यात्रु, सुरक्षाकर्मीलगायतको व्यवस्थापन तथा सबै प्रकारका गतिविधि नियन्त्रणका लागि सीमानाका व्यवस्थापन गरिने मन्त्री जोशीले बताइन्।
‘सीमा नाकाको अवस्था भताभुङ्ग छ मन्त्री जोशीले भनिन्, ‘यो सुदूरपश्चिम प्रवेश गर्ने प्रमुख नाका भएकाले तत्काल काम अगाडि बढाउनुपर्ने छ, यसका लागि हामी दैनिक रुपमा खटिइरहेका छौँ। धनगढी उप–महानगरपालिका र पुनर्वास नगरपालिकाका प्रमुखले प्रतिबद्धता जनाइसक्नुभएको छ’, मन्त्री जोशीले भनिन्, ‘भोलिबाटै बिग्रिएका, भत्किएका, टुटेका संरचना हटाएर यहाँ आउने यात्रु, सुरक्षाकर्मी, हेल्थ डेस्कमा काम गर्ने कर्मचारीलाई सहज हुने गरेर काम बढाउछौं।’
त्यस्तै, अनुगमनका क्रममा सामाजिक विकास मन्त्री लाल बहादुर खड्काले पनि कोरोना महामारीको तेस्रो भेरिअन्ट आउने विषयले चर्चा पाएको र यसको समाधानका साथै सीमा नाकामा आउने यात्रुहरूलाई सास्ती नहोस् भनी भारत सँग जोडिएका सुदूरपश्चिमका सम्पूर्ण सिमा नाकाहरुमा यात्रु होल्डिङ सेन्टरको निर्माण कार्यको थालनी स्वरूप संयुक्त रूपमा निरीक्षण गरिरहेको बताए ।
उनले भने, ‘कोरोना भाइरसको तेस्रो भेरिअन्ट आउने विषय अहिले चर्चाको र छलफलको विषय बनेको छ । त्यसको सामना गर्न यो हाम्रो पूर्व तयारी हो । हामी त्रिनगर सीमा नाका मात्र नभई, कञ्चनपुरको गड्डाचौकी, बैतडीको झुला घाट र दार्चुला सिमा नाकाहरु व्यवस्थित बनाउँदै छौँ । यसका साथै हामी यी सबै नाकाबाट सुदूरपश्चिम भित्रिने नागरिकहरूको कोरोना परीक्षण गर्छौँ र आवश्यकता अनुसार औषधोपचारका साथै सम्बन्धित पालिका सम्म पुग्न यातायातको समेत व्यवस्था गर्छौं ।’ उनले भने । संयुक्त अनुगमनमा रहेका कैलालीको धनगढी उप महानगरपालिकाका नगर प्रमुख नृप वडले प्रदेश सरकारको सहयोगमा भारत सँग जोडिएका कैलाली तथा सुदूरका विभिन्न नाकाहरु पुर्णरुपमा व्यवस्थित हुने र जनताले स्वदेश फर्किदा होस् या जाँदा हरेक तवरको सुरक्षा प्राप्त गर्ने विश्वास व्यक्त गरेका छन् ।
सीमानाका कञ्चनपुरको बेलौरी नगरपालिकामा पर्ने भए पनि गौरीफन्टा नाका भएर भित्रिएकाहरु धनगढी उप–महानगरपालिका हुँदै सुदूरपश्चिमका सबै जिल्ला जाने गरेका छन्।कोरोनाको दोस्रो लहर सुरु भएसँगै भारतको विभिन्न राज्यबाट गौरीफन्टा नाका हुँदै ठूलो संख्यामा सुदूरपश्चिम प्रवेश गरेका थिए। पछिल्लो समययता भने नाका भएर भित्रिनेभन्दा बाहिरनेको संख्या उल्लेख्य रहेको छ ।
