धनकुटामा उत्पादन हुने गाँजा लुकाइछिपाई विराटनगर हुँदै भारततर्फ तस्करी हुने गरेको पाइएको छ । धनकुटामा उत्पादित गाँजा विराटनगर ल्याएर भण्डारण गर्ने तथा सुरक्षाकर्मीलाई छलेर सीमानाका हुँदै भारततिर कटाउने गरिएको पाइएको छ । गाँजाको अवैध ओसारपसार र कारोबारलाई सहज बनाइदिन प्रहरीकै ठालुहरूको समन्वय हुने स्रोतले जनाएको छ ।
भारततिर कटाउन तयारी अवस्थामा राखिएको १८ किलो गाँजा विराटनगर महानगरपालिका–६ ब्रह्मपुरास्थित एउटा घरबाट प्रहरीले शुक्रबार दिउँसो बरामद गर्यो । प्रहरीले गाँजा कारोबारमा संलग्न एक भारतीय नागरिकसहित तीन जनालाई पक्राउसमेत गर्यो । तर, गाँजा कसको घरबाट बरामद भएको हो र पक्राउ पर्नेको नाम पत्ता लागे पनि उनीहरूको विस्तृत विवरण प्रहरीले खुलाउन चाहेको छैन ।
गाँजा भण्डारण गरिएको घर नखुलाउनु, पक्राउ परेकाको विवरण सार्वजनिक नगरिकनुमा प्रहरीको मिलेमतोको पनि आशङ्का गरिएको छ । ठूलो परिमाणमा गाँजाको ओसारपसार गर्न सुरक्षाकर्मीको साथ नभइकन सम्भव नभएको स्रोत बताउँछ ।
यस्तै, धेरै ठाउँमा रहेका सुरक्षा चेकप्वाइन्ट कटाएर धनकुटाबाट विराटनगरसम्म ल्याउँदा पनि बाटोमा पक्राउ नपर्नुले लागुऔषधको अवैध धन्दामा सुरक्षाकर्मीकै मिलेमतोको रहेको कुरा पुष्टि हुन्छ । स्रोतका अनुसार विशेषगरी गाँजा कारोबारमा सुनसरीमा कार्यरत सशस्त्र प्रहरीले सहयोग गरिरहेको पाइएको छ ।
धनकुटाको छिन्ताङतिर उत्पादन भएको गाँजा त्यहाँबाट सुनसरी हुँदै विराटनगर ल्याइन्छ । विराटनगर प्रवेशको मुख्य नाका सुनसरी भएकाले गाँजा कारोबारमा संलग्नले सुनसरीको सुरक्षा सर्तकतालाई विशेष महत्व दिने गरेको छ ।
गत बिहीबार प्रहरीले विराटनगरबाट गाँजा कारोबार गर्ने गिरोहमा संलग्न भारतीय नागरिक सोनु यादव, सुनसरी देवानगञ्जका रन्जितकुमार यादव र धनकुटा घर भएका रुद्र राईलाई पक्राउ गरेको थियो ।
पक्राउ परेकाहरूमाथि अनुसन्धान गर्ने क्रममा उनीहरूले विराटनगरको ब्रह्मपुरामा लुकाएर राखेको अवस्थामा गाँजा बरामद भएको थियो । जिल्ला प्रहरी कार्यालय मोरङका प्रहरी नायव उपरीक्षक मानबहादुर राईका अनुसार भारत कटाउनका लागि धनकुटाबाट विराटनगरसम्म ल्याएर गाँजा राखेको पाइएको छ ।
प्रहरीको हिरासतमा रहेका रन्जितले गाँजा कारोबारका लागि मध्यस्थकर्ताको भूमिका खेलिरहेको खुलेको छ । त्यक्रममा उनले विभिन्न सशस्त्र प्रहरी तथा नेपाल प्रहरीसँग समन्वय गरेको पनि स्रोतले जनाएको छ ।
तस्करीमा प्रहरीका ठालुहरूको भूमिका
स्रोतका अनुसार गाँजा मात्र होइन, पेट्रोलियम पदार्थ तथा सुपारीलगायत वस्तु भारततर्फ तस्करी गर्नमा प्रहरीको भूमिका रहेको स्रोतको भनाइ छ । यस विषयमा सानो पदमा बसेका प्रहरीको भन्दा ठालुहरूकै भूमिका धेरै हुने स्रोत बताउँछ ।
केही दिनअभिघ झापामा तीन ट्रक अवैध सुपारीलाई भारत तस्करी गराउने सेटिङमा १ नम्बर प्रदेशका दुई जना प्रहरी नायबमहानिरीक्षक (डीआईजी)को नाम पनि मुछिएको थियो ।
जनपद प्रहरीका डीआईजी ईश्वरबाबु कार्की र सशस्त्र प्रहरी बल १ नं. वराह वाहिनी मुख्यालय इटहरी, पकलीका डीआईजी वंशीराज दाहालले उक्त सुपारीको ट्रक भारत तस्करी गराउने काममा पैसा बुझेको आरोप छ । दुई साताअघि झापाको काकडभिट्टा क्षेत्रबाट तेस्रो मुलुकबाट भित्रिएको सुपारी भारत तस्करी गराउने काममा करिब ३० लाख रुपैयाँमा ‘डिल’ भएको जनाइएको छ । ‘डिल’ भएको सूचना र अडियो चुहिएपछि लोड भएका ट्रकहरू एकाएक गायब बनाइएको स्रोतको दाबी छ ।
यद्यपि, दुवै डिआइजीले सुपारी तस्करीको विषयमा आफूहरुको कुनै संलग्नता नरहेको स्पष्ट पारेका छन् ।
