मङ्गलबार अविरल वर्षासँगै आएको बाढीले सुन्दर मेलम्ची बजार बगरमा परिणत भएको छ ।
जिल्ला प्रहरी कार्यालय सिन्धुपाल्चोकका अनुसार बाढीले बगाउँदा ७ जनाको मृत्यु भएको छ । मेलम्ची खोला उर्लिंदा बस्ती डुबानमा पर्नुका साथै घर र पुलहरू बगाएको छ ।
सिन्धुपाल्चोक जिल्लाको हेलम्बु गाउँपालिका वडा नं १ नाकुत्तेभन्दा करिब ५०० मिटर माथिबाट झरेको पहिरोले मेलम्ची नदीको बहाव थुनिएर बनेको बाँध भत्काए पश्चात बाढी आएको हो ।
उक्त बाढीको कारणले हेलम्बु गाउँपालिका र मेलम्ची नगरपालिकामा अपुरणीय क्षती भएको छ ।
जिल्ला प्रशासन कार्यालय बिहीबार रातिसम्म सङ्कलन गरेको विवरणअनुसार २ चिनिया र एक भारतीय नागरिकको शव भेटिएको छ । बाढीमा परेर २० जना बेपत्ता भएका छन् भने बेपत्ता भएका ४ जना सम्पर्कमा आएका छन् ।
बाढीले १० वटा झोलुंगे पुल, ६ वटा पक्की पुल र ७ वटा ट्राउट माछामा पूर्णरुपमा क्षति गरेको छ ।
कसरी बगरमा परिणत भयो सुन्दर मेलम्ची
मङ्गलबार बाढी भन्दा अगाडि लेदो बगाएर आयो । जस्को कारण सबै भाग्न पाए र ठूलो मानविय क्षति भने हुन पाएन । स्थानिय शिव चालिसे केटिएम दैनिकलाई दिएको जानकारी अनुसार खोलाको सतह ३० देखि ४० फिट सम्म बढेको छ । त्यही लेदोले खोलाको सतह ४० फिट सम्म बढेको उनको भनाइ छ ।
उनले भने, ‘यहाँ भएका ३ तले घरहरु पनि अहिले एक तले जस्तो देखिएका छन् । बाँकी २ तला भने पुरिएको छ । दिउँसो नै भएकोले धेरैले ज्यान जोगाउन सफल भए । नत्र त यही खोला मात्र बाँकी रहन्थ्यो ।’