सुदूरपश्चिम प्रदेशमा २२ दशमलव ४३ मेगावाट क्षमताका तीन वटा जलविद्युत आयोजनाको विस्तृत परियोजना प्रतिवदेन तयार पार्ने काम जारी निषेधाज्ञाले प्रभावित बनेको छ ।
६ दशमलव ९७ मेगावाट क्षमताको नौगाड, ७ दशमलव ७५ मेगावटको सुर्नयागाड र ७ दशमलव ७१ मेगावाटको माथिल्लो सुर्नयागाड जलविद्युत आयोजनाको प्रारम्भिक वातावरणीय प्रभाव अध्ययन भने सम्पन्न भइसकेको छ । तर कोरोना महामारीले जनशक्ति परिचालन हुन नसक्दा विस्तृत परियोजना प्रतिवदेन तयार पार्ने काम भने रोकिएको हो ।
सुदूरपश्चिम प्रदेश सरकारले गत फागुनमा तीन वर्षे प्रगति विवरण सार्वजनिक गर्दै प्रदेश सरकारको लगानीमा बन्ने ६ दशमलव ९७ मेगावाट क्षमताको नौगाड, ७ दशमलव ७५ मेगावाटको सुर्नयागाड र ७ दशमलव ७१ मेगावाटको माथिल्लो सुर्नयागाड जलविद्युत आयोजनाको प्रारम्भिक वातावरणीय प्रभाव अध्ययनलाई प्रमुख उपलब्धि बताएको थियो ।
आयोजना अन्तर्गत विस्तृत परियोजना प्रतिवदेन असार १५ गतेभित्र तयार पार्नुपर्ने भनिएको थियो । तर कोरोना महामारीले जनशक्ति परिचालन हुन नसक्दा विस्तृत परियोजना प्रतिवदेन तयार पार्ने काम भने रोकिएको हो । भौतिक पूर्वाधार विकास मन्त्रालयका सूचना अधिकारी छविराज जैशीले कोरोना महामारीले जनशक्ति परिचालन हुन नसक्दा विस्तृत परियोजना प्रतिवदेन (डीपीआर) तयार पार्ने काम प्रभावित भएको बताए ।
आगामी आर्थिक वर्ष २०७८÷७९ देखि तीनओटै आयोजना गरी कुल २२ दशमलव ४३ मेगावाट विद्युत उत्पादनका लागि श्रोत सुनिश्चितता सहित निर्माण प्रक्रिया थालिने मन्त्रालयले बताए पनि डीपीआरको काम नै सम्पन्न हुन सकेको छैन । डीपीआर तयार पार्ने काम प्रभावित हुने देखिएपछि प्रदेश सरकारले ६ महिना म्याद थप गर्ने तयारी गरेको छ । भौतिक पूर्वाधार विकास मन्त्रालयको आवास, भवन तथा शहरी विकास महाशाखाका इन्जिनीयर महिम बोहराले निर्धारित अवधिमा प्रतिवेदन तयार हुन नसकेपछि म्याद थप्ने तयारी भइरहेको बताए ।
सुदूरपश्चिममा १८ हजार १४९ मेगावाट जलविद्युत उत्पादन गर्नसक्ने सम्भावना रहेको बताइएको छ । तर प्रदेशमा जम्मा ४१ दशमलव ८ मेगावाट मात्र जलविद्युत उत्पादन हुन सकेको छ । जसका कारण सुदूरपश्चिमका लागि आवश्यक विद्युत भारतबाट किन्नु पर्ने बाध्यता कायमै छ।
