मुस्ताङको वारागुङ मुक्तिक्षेत्र गाउँपालिकाको लुप्रा खोलामा लेदोसहितको बाढी आएको छ ।
खोलामा बाढी आएपछि खोलाकिनारामा रहेको लुप्रा गाउँ जोखिममा परेको छ । सोमबार करिब १२ बजेदेखि एक्कासी लेदोसहित बाढी आउँदा बस्ती जोखिममा परेको गाउँपालिका प्रमुख फेञ्चोक छेप्तेन गुरुङले बताए ।
बाढीका कारण बस्तीका करिब १५ घर पूर्ण जोखिममा छन् । गाउँपालिका प्रमुख गुरुङले निरन्तर पानी परिरहेका कारण थप क्षति हुन नदिन सुरक्षित ठाउँमा स्थानान्तरण गर्ने काम भइरहेको जानकारी दिए । लेदो र बुट्यानको लेदो आएपछि कतै हिमताल फुटेको हो कि भन्ने शंका उब्जिएतापनि मुस्ताङको प्रमुख जिल्ला अधिकारी हिरादेवी पौडेललले हिम पहिरोको सम्भावना नभएको बताइन् ।
ठुलो बेगमा आएको बाढीले आज जोमसोम मार्फा सडक अबरुद्व बनाएको छ ।
सबै तस्विर : निरज थकाली