नेपाली राष्ट्रिय क्रिकेट टिमको जर्सी डिजाइन गर्नेलाई एक लाख पुरस्कार दिइने भएको छ । नेपाल क्रिकेट सङ्घ (क्यान) र नेपाली राष्ट्रिय क्रिकेट टोलीको मुख्य प्रायोजक माई सेकेन्ड टिचर (एमएसटी) ले सोमबार विज्ञप्ति निकाल्दै राष्ट्रिय टिमको जर्सी डिजाइन गर्नका लागि प्रतिस्पर्धा खुल्ला भएको जनाएको छ ।
क्यानले विज्ञापन एजेन्सी एडप्याडमार्फत माई सेकेण्ड टिचरलाई राष्ट्रिय टोलीको प्रमुख प्रायोजकको रूपमा पाएको हो । एड प्याडका प्रबन्ध निर्देशक सुरज गिरीका अनुसार उत्कृष्ट डिजाइन बनाउनेले पुरस्कारस्वरूप नगद एक लाख रुपैयाँ पुरस्कार प्राप्त गर्नेछन् ।
डिजाइन गर्नेले राष्ट्रिय टोलीको जर्सीको अगाडि र पछाडिको भाग दुवैलाई ध्यानमा राखेर डिजाइन गर्न पर्ने हुन्छ । कुनै पनि व्यक्तिले जर्सीको डिजाइन गर्दा नेपालको राष्ट्रिय झन्डामा प्रयोग हुने रातो र निलो रङ्गको प्रयोग गर्न पर्ने विज्ञप्तिमा जनाइएको छ ।
डिजाइनरले जर्सीको डिजाइन गर्दा राष्ट्रिय टोलीले पालना गर्न पर्ने अन्तर्राष्ट्रिय क्रिकेट परिषद् (आइसिसी) को नियम अनुसार नै डिजाइन गर्न पर्ने हुन्छ । क्यानले विज्ञापन एजेन्सी एडप्याडमार्फत माई सेकेण्ड टिचरलाई राष्ट्रिय टोलीको प्रमुख प्रायोजकको रुपमा पाएको हो ।
‘जर्सीको डिजाइन असार ४, २०७८ भित्र [email protected] मा पठाउनु पर्नेछ। नेपाल क्रिकेट संघको नाममा अन्यत्र जर्सी डिजाइन सम्बन्धी आएको सूचनाहरू आधिकारिक नभएको जनाउन चाहन्छौँ,’ क्यानको विज्ञप्तिमा भनिएको छ ।
क्यानले जर्सीको डिजाइन जुन १७ सम्म पठाइसक्नुपर्ने जनाएको छ । जर्सी छनोट समितिले उत्कृष्ट डिजाइनलाई छनोट गर्नेछ । नेपाल अब आइसिसी विश्वकप क्रिकेट लिग–२ अन्तर्गत नेपाल, स्कटल्यान्ड र नामिबियाबीचको त्रिकोणात्मक एकदिवसीय सिरिजको तयारीमा जुट्ने छ ।
यसअघि स्कटल्यान्डमा हुने भनिएको त्रिकोणात्मक सिरिज अब स्पेनमा हुनेछ । लिगअन्तर्गत नेपालले घरेलु मैदानमा ओमान र अमेरिकासँग चार खेल खेलिसकेको छ । लिगको छैटौँ स्थानमा रहेको नेपालले चार खेलमा चार अङ्क जोडेको छ ।
