आषाढ १ गते मङ्गलवार दिउँसो १ बजेर ३२ मिनेटबाट सूर्य ग्रह एक महिनाका लागि मिथुन राशिमा राशि परिवर्तन हुन लागेको छ । आषाढ महिनाभरि सूर्यको मिथुन राशिमा गोचर हुँदा यसको प्रभाव समग्र क्षेत्रमा फरक फरक तरिकाबाट पर्ने छ ।
मङ्गलवार सङ्क्रान्ति, शनिवार पूर्णिमा तथा आइतबार औँसी तिथिको संयोग जुरेकाले आषाढ महिनालाई अर्थपूर्ण रूपमा हेरिरहेको छ । यस्तो समयमा सकारात्मक भन्दा पनि नकारात्मक प्रभाव धेरै पर्ने अनुमान गरिएको छ । २० आषाढबाट बुध ग्रह आफ्नै राशि मिथुनमा गौचर गरेपछि मात्रै शुभ फलदायी बुधादित्य योगको शुभ फल प्राप्त हुने ज्योतिष सुरेशचन्द्र रिजाल बताउँछन् ।
आषाढ ७ गते बिहीबार देखि देबगुरु बृहस्पति करिब चार महिनाका लागि बकृ अवस्थामा रहनाले देशैभरि नै सामान्य देखि भारी वर्षाको सम्भावना रहने हुँदा विशेष सावधानी अपनाउनु पर्ने छ । बृहस्पतिको प्रभाव विशेष गरी बोट बिरुवामा पर्ने भएकाले चार महिना सम्म प्राकृतिक विपत्ति ठूलाठूला पहिरोबाट धेरै बोटबिरुवा नष्ट हुनुका साथै मानवीय बस्तीहरूमा समेत यसको उच्च प्रभाव रहने उनले बताए । आषाढ सात गते देखि पुनः शुक्र ग्रह जलतत्व राशि कर्कटमा प्रवेश गरे पछि शुक्रको युक्तिसंगतले भारी वर्षाको सम्भावना रहने देखिन्छ । समयमै सावधानी अपनाउन नसके ठुलै धनजनको नोक्सान पूर्वी तथा दक्षिणी भागमा पर्ने छ । केटिएम दैनिकसँग उनले भने ।
सेनाधिपति मङ्गल ग्रह र देव गुरु बृहस्पति त्यस्तै शनि सूर्यको षडाष्टक योग परेकाले अचानक राजनीति परिवर्तन हुनुका साथै उच्च पदस्थ व्यक्तिलाई निक्कै कष्ट पर्ने योग देखिएको ज्योतिष रिजालले बताए । न्याय कारक ग्रह शनि र राज्य कारक ग्रह सूर्य अत्यन्तै खराब मानिने षडाष्टक योगमा रहेकाले सत्ता पक्ष र न्याय पक्षको आपसी नकारात्मक द्वन्द्व उच्च विन्दुमा पुग्नुका साथै सत्ता पक्ष निक्कै कमजोर साबित हुने देखिएको छ । आषाढ २६ सम्म क्षत्र भङ्ग योग रहिरहेकाले सहमतिमा कुनै पनि सहकार्य नहुने देखिएको छ ।
बहुमूल्य सामान सुन, चाँदी, तामा लगायतका सामानको मूल्य वृद्धि भइरहने छ । खाद्यान्न तथा तेलको पनि निरन्तर मूल्यवृद्धिको मारमा जनता परि नै रहने छन् । पूर्वी क्षेत्रमा बाढीको प्रभाव उच्च रहने छ भने पश्चिमी भूभागमा पहिरोको उच्च जोखिम रहने देखिएको उनले बताए । विद्यार्थीहरुकालागि महिना भरि नै पठनपाठनमा अवरुद्ध हुने देखिएको उनी बताउँछन् ।