प्रदेश २ सरकारले प्रस्तुत गरेको नीति तथा कार्यक्रम सर्वसम्मतले पारित भएको छ। प्रदेश सरकारले आर्थिक वर्ष २०७८/०७९ को लागि ल्याएको नीति तथा कार्यक्रम सर्वसम्मत पारित भएको सभामुख सरोज यादवले घोषणा गरेका छन्।
नीति तथा कार्यक्रमाथि दुई दिनको छलफलपछि मुख्यमन्त्री लालबाबु राउतले प्रदेशसभामा निर्णयार्थ प्रस्तुत गरेको नीति तथा कार्यक्रमको समर्थन सबै दलका प्रदेशसभा सदस्यहरुले गरेका थिए।
यसअघि नीति तथा कार्यक्रममा संशोधनका लागि प्रदेशसभा सदस्यहरु शिवचन्द्र चौधरी, सीता गुरुङ, सुन्दर बहादुर विश्वकर्माले राखेका संशोधन प्रस्ताव फिर्ता लिएका थिए भने प्रदेशसभा सदस्य दिलीप साहको संशोधन प्रस्ताव बहुमतले अस्वीकृत गरिएको थियो।
नीति तथा कार्यक्रम प्रदेशसभामा पारित भएपछि प्रदेश सरकारले अब आर्थिक वर्ष २०७८/०७९को बजेट ल्याउने तयारी गर्नेछ। जेठ २७ गते प्रदेश प्रमुख राजेश झाले नीति तथा कार्यक्रम प्रस्तुत गरेका थिए।
के छ नीति तथा कार्यक्रममा
नीति तथा कार्यक्रममा कोभिड महामारी नियन्त्रण, स्वस्थ्य, कृषि, पर्यटन, स्वरोजगार, शिक्षा र सिँचाइलाई प्राथमिकता दिइएकाे छ ।
कोभिड परीक्षणको दायरा बढाइने, पूर्ण खोप प्रदेश अभियान चलाइने, दलित तथा सीमान्तकृत समूदायलाई निःशुल्क स्वास्थ्य सुविधा उपलब्ध गराइने नीति अख्तियार गरिने नीति तथा कार्यक्रममा उल्लेख छ ।
जनकपुरस्थित मणिपाल अस्पताको निर्माणधीन अस्पताललाई कोभिड अस्पताल बनाउने, अस्पतालहरुमा स्वास्थ्यकर्मीहरुको दरबन्दी थप्ने, ८ वटै जिल्लामा कम्तिमा एउटा स्वास्थ्य तथा आरोग्य केन्द्रको स्थापना गरिने, प्रदेशको आफ्नै स्वास्थ्य नीति ल्याइने, स्वास्थ्य क्षेत्रमा सुशासन र पारदर्शिता ल्याउन प्रभावकारी कदमहरू चालिने नीति तथा कार्यक्रममा उल्लेख छ ।
कोभिड आपतकालीन सेन्टर बनाउने र भारतसँगका सीमा नाकाहरुमा हेल्थ डेक्सह स्थापना गरी नियमित स्वास्थ्य जाँच गर्ने र स्वास्थ्य कर्मचारीलाई स्वास्थ्य बीमा लगायत कार्यक्रम पनि राखिएकाे । नीति तथा कार्यक्रममा चुरे संरक्षणलाई विशेष प्राथमिकता साथ समावेश गरिएको छ ।
