भारतले आफ्नो भूमिमा सडक खन्दा नेपालतर्फको घोडेटो बाटो भत्किएको छ । भारतले कैलाश मानसरोवर सडक खण्ड निर्माणको क्रममा विष्फोटक पदार्थ विष्फोट गर्दा नेपालतिरको बाटोमासमेत असर पुगेको हो ।
सीमावर्ती क्षेत्रमा भएका ज्यादती रोक्न जिल्ला प्रशासन कार्यालय दार्चुलाले भारतलाई पत्र पठाएको छ।दार्चुलाका प्रमुख जिल्ला अधिकारी सिद्धराज जोशीले भारतको पिथौरागढस्थित धारचुलाका जिल्ला अधिकारी (डिस्ट्रिक मजिस्ट्रे) आनन्द स्वरूपलाई नेपालको भू–भागमा असर पुग्ने गरी भएका गतिविधि रोक्न आग्रह गरेका हुन। त्यसको जानकारी गृह मन्त्रालयमा पनि गराइएको प्रजिअ जोशीले बताए।
पत्रमा भारतीयका कारण नदीको बहाव नेपालतर्फ धकेलिनुका साथै बाटोमै नदी पसेकाले त्यसलाई खुलाउन भनिएको छ। यसको जवाफ उताबाट आइनसकेको उनले जानकारी दिए।उनका अनुसार स्थानीय र प्रदेश सरकारको लगानीमा निर्माण गरिएको घोडेटो बाटो पूर्ण रुपमा भत्किएको छ । जसले गर्दा नेपालतिरको आवतजावत पूर्ण रुपमा बन्द भएको छ ।
भारतले धार्चुला लिपुलेक मानसरोवर सडक दुई लेनको बनाउनका लागि हाल गर्वाधार क्षेत्रमा चट्टान काटिरहेको छ ।ढुंगा महाकाली नदीमा गएर नदीको धार परिवर्तन गरेको छ। भारत सरकारले महाकाली नदी किनारै किनार भएर सडक निर्माण गरेको छ । जसको कारण अधिकांश ढुंगाले नदी थुनिने र नेपालतिर क्षति पुर्याउने गरेको छ । भारतीयले सडक निर्माणको क्रममा ढुंगा आएर अवरुद्ध भएको छाङरु जोड्ने नेपालतिरको घोडेटो बाटो प्रहरी र स्थानीयको सक्रियतामा निर्माण सुरु गरिएको छ ।
