धनुषामा पोखरीमा डुबेर पाँच जना बालिकाको मृत्यु भएको छ । मुखियापट्टी मुसहरमिया गाउँपालिकाको बहेडा बेला र तुल्सीयाहीको बिचमा रहेको पोखरीमा डुबेर पाँच जना बालिकाको मृत्यु भएको हो ।
जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटका अनुसार पोखरीमा पौडी खेल्ने क्रममा १० देखि १३ वर्ष सम्मको ५ जना बालिकाको डुबेर मृत्यु भएको हो । उनले पोखरीबाट ५ जनाको शव निकालिए पनि दुई जनाको खोजी भइरहेको बताए ।
केटिएम दैनिकसँगको टेलिफोन सम्पर्कमा प्रहरी उपरीक्षक रानाभाटले भने, ‘पौडी खेल्ने क्रममा डुबेर मृत्यु भएको खबर पाउनासाथ प्रहरी जाँदा ५ जना बालिकाको शव निकालेका छौँ। दुई जना अझैपनि बेपत्ता छन्।’
पोखरीमा डुबेर मृत्यु हुनेमा १२ वर्षीया लक्ष्मीनिया यादव, १० वर्षीया चन्दा कुमारी भगत, १३ वर्षीया अन्जु पुर्वे, १२ वर्षीया चाँदनी ठाकुर र १२ वर्षीया ललिता साह तेली रहेको प्रहरीले जनाएको छ।
जिल्ला प्रहरी कार्यालयबाट प्रहरी नायव उपरीक्षक मकेन्द्र कुमार मिश्रको नेतृत्वमा प्रहरी टोली घटनास्थलमा रहेको रानाभाटले बताए।