कञ्चनपुरमा डाका चोरी मुद्दाका एक फरार प्रतिवादी ३८ वर्षपछि पक्राउ परेका छन्। साविकको लक्ष्मीपुर गाविस वडा नम्बर ८ भैसोरी र हालको बेलौरी नगरपालिका वडा नम्बर २ का ५५ वर्षीय चन्द्रकान्त भन्ने लालबहादुर लुहार पक्राउ परेका हुन्। जिल्ला प्रहरी कार्यालयबाट खटिएको टोलीले उनलाई आफ्नै घरमा लुकीछिपी बसेको अवस्थामा पक्राउ गरेको हो।
प्रहरीका अनुसार अभियुक्त लुहार २०४० पुस १० गते लारी डिष्टीलरी बेलौरीबाट अन्तशुल्क वापतको सरकारी रकम लक्ष्मीपुर पुनर्वासस्थित राष्ट्रिय बैकंमा जम्मा गर्न जाने क्रममा लक्ष्मीपुर र त्रिभुवनबस्तीबिच पर्ने जंगलमा बन्दुक, बञ्चरो लगायत हातहतियार देखाई लुटपाट तथा कुटपिट घटनामा संलग्न भई फरार रहेका थिए।
उनलाई कञ्चनपुर जिल्ला अदालतले २०४२ बैशाख २५ गते ३ वर्ष १ महिना १५ दिन कैद सजाय सुनाएको थियो। फरार रहेका उनलाई पक्राउ गरी अदालतमा पेश गरिएकोमा कैद भुक्तानको लागि कारागार चलान गरिएको जिल्ला प्रहरी कार्यालय कञ्चनपुरका प्रहरी नायव उपरीक्षक अमरबहादुर थापा क्षेत्रीले बताए।
