डा सिके राउत अध्यक्ष रहेको पार्टी जनमत पार्टीले जिल्ला समन्वय समितिको पदाधिकारी निर्वाचन कोभिड-१९ को महामारीले गर्दा ई-भोटिङ्गको मार्फत् गर्ने निर्णय गरेको छ ।
साथै उक्त पार्टीले संसद विघटन गरी तोकिएको मध्यावधि चुनावको तयारीमा रहन आफ्ना नेता तथा कार्यकर्तालाई आग्रह गरेको छ ।
आज पार्टीको केन्द्रिय कार्यकारिणी समितिका ४ निर्णयहरु सार्वजनिक गर्दै अध्यक्ष डा सिके राउतले जिल्ला समन्वय समितिका पदेन तथा मनोनित सदस्यहरूको सूचीमा छुटेका योग्य व्यक्तिहरूको नाम समावेश गरी अन्तिम सूची चाँडै प्रकाशित गरिने बताएका छन् ।
यस्ता छन् केन्द्रिय कार्यकारिणी समितिका निर्णयहरू
१. २०७८ साल ज्येष्ठ २२ गते विहान १०:०० बजे बसेको जनमत पार्टी केन्द्रिय कार्यकारिणी समितिको बैठकले जिल्ला समन्वय समितिको पदाधिकारी निर्वाचन कोभिड-१९ को महामारीले गर्दा जारी रहेको निषेधाज्ञाको कारणले भौतिक रूपले ने २०७८ ज्येष्ठ ३० गते गर्न नसकिने, जिल्ला स्तरमा पूर्ण बैठक बोलाएर सर्वसम्मति खोज्ने अवस्था समेत नरहेको, तथा ई-भोटिङ्गको मार्फत् गर्न समेत तल स्तरसम्म उपयुक्त तैयारी नपुगेको ठहर गरेको छ।
२.तर २०७८ साल कार्तिक २६ र मंसीर ३ गतेका लागि प्रतिनिधि सभाको निर्वाचन मिति तय भइसकेको र सोको लागि आवश्यक तयारीमा सम्पूर्ण नेता कार्यकर्ताहरूलाई एकबद्ध भएर जुट्नु पर्ने अवस्था आएकाले जिल्ला समन्वय समितिको पदाधिकारी चयनलाई पछिको मितिका लागि तत्कालै सार्न समेत उपयुक्त नदेखिएको हुँदा केन्द्रिय कार्यकारिणी समितिले नै ६ महिनाको लागि सबै जिल्लामा पदाधिकारी तोक्ने निर्णय गरेको छ।
३. जिल्ला समन्वय समितिका पदेन तथा मनोनित सदस्यहरूको सूचीमा छुटेका योग्य व्यक्तिहरूको नाम समावेश गरी अन्तिम सूची चाँडै प्रकाशित गरिनेछ। वडा तथा पालिका समितिको विवरणमा समेत छुटेका, त्रुटि भएका वा दोहोरो समिति निर्माण भएका विषयहरूमा समेत सम्बन्धित जिल्लासँग समन्वय गरी छिट्टै समाधान निकालिनेछ।
४. यसका साथै सम्पूर्ण नेता तथा कार्यकर्ताहरूमा “पार्टीको विजय नै हाम्रो विजय हो” भन्ने भावना आत्मसात् गरी २०७८ साल कार्तिक २६ र मंसीर ३ गते हुने प्रतिनिधि-सभाको निर्वाचनको तयारीमा जुट्न र सुरक्षित तरीकाले निर्वाचन लक्षित घरदैलो, प्रचार-प्रसार जस्ता कार्यक्रमहरू सुचारू गर्न अनुरोध गरिएको छ।