मजदुरका लागी मजदुर अभियान भन्ने नारा बोकेर विगत केही वर्ष देखि प्रवासी नेपाली श्रमिकहरुको स्वतन्त्र रूपमा प्रतिनिधित्व गर्दै आएको नेपाली मजदुर एकता समाज केन्द्रीय समितिले वैदेशिक रोजगारीमा विभिन्न कारण समस्यामा परेका अथवा कोरोना भाइरसको कारण अलपत्र श्रमिक हर्को उद्दार गर्न नेपाल सरकारद्वारा बनाइएको संयन्त्र द्रुत प्रतिकार्य समूह (र्यापीड रेसपोन्स टीम) तथा नेपाल सरकारको गम्भीर ध्यानाकर्षण गराएको छ ।
समाजका प्रवक्ता विजय भुसाल ले हस्ताक्षर गरेको ध्यानाकर्षण पत्रमा युएईमा दैनिक एउटा वाइड बडी फ्लाइट हुनुपर्ने त्यस्तै मलेसिया र साउदीमा हप्ताको एउटा वाइडबडि फ्लाइट हुने व्यवस्था मिलाउन समेत माग गरिएको छ ।
नेपाल लगायत विभिन्न मुलुकहरूमा कोरोना भाइरस कोभिड-१९ को कारण अवरुद्ध हुन पुगेको नियमित अन्तर्राष्ट्रिय उडानहरूको कारण वैदेशिक रोजगारीको सिलसिलामा मलेसिया, साउदी अरेबिया, युनाइटेड अरब इमिरेट्स युएई, कतार बहराइन,ओमन लगायतका देशहरूमा भिसा अवधि सकिएका नेपाली श्रमिकहरू र उक्त देशहरूमा कार्यरत रहँदा विभिन्न कारण मृत्यु हुन पुगेका नेपाली श्रमिकको शव अलपत्र पर्न थालेको गुनासो र जानकारी हामीलाई दिनु जसो निरन्तर आएपछि समाजका प्रबक्ता विजय भुसालले एक विज्ञप्ति जारी गर्दै युएईको हकमा कम्तीमा प्रत्येक दिन एउटा वाइड बडी फ्लाइट त्यस्तै मलेसिया र साउदीमा हप्तामा एउटा वाइड बडी र अन्य देशमा पनि आवश्यकता अनुसार फ्लाइट गर्ने व्यवस्था मिलाएर प्रतीक्षारत श्रमिक र मृतकका शव लाई अविलम्ब नेपाल फर्काउन संयन्त्र र नेपाल सरकारले तत्कालै आवश्यक प्रक्रिया अगाडी बढाउने अनुरोध गरेको छ।
विगतको वर्षमा झैँ यो वर्ष कुनै पनि देशमा श्रमिकहरू अलपत्र र भोक भोकै दयनीय अवस्थामा स्वदेश फर्किने दिन गन्दै बस्नुपर्ने अवस्थाको सिर्जना हुन नदिन अहिले नै नेपाल सरकारले आवश्यक प्रक्रिया अगाडि बढाउन समेत हाम्रो संस्था नेपाली मजदुर एकता समाज नेपाल सरकारद्वारा बनाएको संयन्त्र तथा नेपाल सरकार समक्ष माग गरेको छ ।
मजदुर समाजका महासचिव समर्पण भट्टराईको सक्रियतामा सङ्कलन गरिएको पछिल्लो जानकारी अनुसार युएईमा २ वटा शव सहित ४ देखि ५ हजारको सङ्ख्यामा नेपालीहरू स्वदेश फर्कन पाएका छैनन् त्यसैगरि मलेसियामा पनि ३० वटा भन्दा बढि शवहरू सहित हजारौँ नेपाली स्वदेश फर्किन पाएका छैनन् भने साउदी अरेबियामा पनि १० वटा भन्दा बढी शव सहित हजारौँको सङ्ख्यामा नेपालीहरू प्रतीक्षारत रहेका छन् ।
त्यस्तै कतारमा ५,कुवेतमा ३,बहराइनमा १ शव सहित सयौँ नेपाली श्रमिक स्वदेश फर्किने प्रतीक्षामा छन् । ओमन बाट पनि सयौँ नेपाली स्वदेश फर्किन चाहेका छन् । यश बारेमा समयमै नेपाल सरकार गम्भीर भएर कदम नचाले विगतको वर्ष जस्तै हजारौँ हजार नेपाली विदेशमा अलपत्र पर्ने हुँदा नेपाल सरकारको ध्यानाकर्षण गराइएको समाजका अध्यक्ष तेजबहादुर कार्कीले बताएका छन् ।