विराटनगरको सिनेमा हलमा उद्योगीहरूलाई खोप दिएको विषयमा प्रदेश १ सामाजिक विकास मन्त्रालयले छानबिन थालेको छ । आइतबार विज्ञप्ति जारी गर्दै सामाजिक विकासमन्त्री उषाकला राईले उक्त विषयमा छानबिन सुरु भएको बताउँदै दोषी देखिए कारवाही गर्ने जानकारी दिएकी हुन् ।
शुक्रबार विराटनगरको सिटी सिनेमा हलमा उद्योगीहरूलाई सुटुक्क कोरोना भाइरसविरुद्धको खोप लगाइएको थियो । कोरोना महामारीविरुद्ध अग्रमोर्चामा खटिएकाले दोस्रो डोजको खोप नपाइरहेको अवस्थामा नेकपा एमाले पार्टी समर्थक र केही उद्योगीलाई लुकाएर खोप लगाएको भन्दै स्थानीय विरोधमा उत्रिएका थिए ।
मन्त्रीको सिफारिसमा नीजि सिनेमा हलमा सार्वजनिक सूचनाबिना पहुँच पुगेका व्यक्ति र उद्योगपतीहरूलाई गोप्य रूपमा कोरोनाविरुद्धको खोप लगाइँदै गरेको सूचना पाएपछि स्थानी विरोधमा उत्रिएका थिए ।
बिराटनगरको सिटी सिनेमा हलमा उद्योगीलाई सुटुक्क खोप लगाएको थाहा पाएपछि आक्रोशित भएका स्थानीयहरु (भिडिओ)
शुक्रबार दिउँसो १ बजे विराटनगर–२ तीनपैनीस्थित सिटी सिनेमा हल परिसरमा पहुँच पुगेकाहरूलाई कोरोनाविरुद्धको दोश्रो डोज दिइन लागेको थियो । विराटनगरको सिटी सिनेमा हल नियमित खोप लगाउने खोप केन्द्र होइन ।
उक्त विषयमा सम्बन्धित कार्यालय र संलग्न कर्मचारीहरूलाई सोधपुछ र सो विषयमा छानबिन प्रक्रिया सुुरु गरिएको सामाजिक विकास मन्त्री उषाकला राईको स्वकीय सचिवालयले जनाएको छ । भयावह अवस्थामा खोप जस्तो विषय कसैले पनि र कुनै पनि निकायले दुरुपयोग गरिएको ठहरिएमा कानून बमोजिम दण्डनिय हुने कुरा स्वभाविक रहेको जारी गरिएको विज्ञप्तिमा उल्लेख छ ।
यो पनि : सिनेमा हलमा उद्योगीलाई सुटुक्क कोभिड खोप, गोप्यता भङ्ग भएपछि भागाभाग
विज्ञप्तिमा भनिएको छ,‘लापरबाही र अनुशासनहीन काम गरीएको ठहरिएमा मन्त्रालयले कारबाही गर्ने कुरामा विश्वास दिलाउन चाहन्छौं ।’ प्रदेश १ मा कोभिशिल्ड खोपको पहिलो डोज लगाएर दोस्रो डोजको प्रतिक्षामा रहेका व्यक्तिहरूलाई दोस्रो डोज लगाउन कोभिशिल्ड नआएको कुरा यथार्थ रहेको विज्ञप्तिमा जनाइएको छ ।
सम्पूर्ण नागरिकहरुलाई कोभिड–१९ विरुद्धको खोप उपलब्ध गराउने सरकारको पहिलो प्राथमिकता रहेको जनाईएको छ । सरकार सबै नागरिकको भएकाले सबैलाई खोप लगाउने र स्वास्थ्य सेवा र सुविधा पु¥याउने कुरामा जनतामा समर्पित भई विभेदरहीत ढंगले मन्त्रालयले सम्पूर्ण काम गरिने विज्ञप्तिमा जनाइएको छ ।
