साताको शुरुवातदेखि नेपाल स्टक एक्स्चेञ्ज(नेप्से)मा दैनिक नयाँ नयाँ रेकर्ड कायम भएको छ । गत दुई दिन लगातार बढेर उच्च बिन्दुमा पुगेको परिसूचक मंगलबारको बजारमा भने परिसूचक र कारोबार रकम दुबैमा एतिहासिक रेकर्ड कायम भएको छ ।
मंगलबार सेयर बजार परिसूचक ३४.५३ अंकले बढेको छ। नेप्से सूचक २८ सय नजिक पुगेको छ। मंगलबार नेप्से सूचक २७९३.७४ विन्दुमा उक्लिएको छ। यो अहिलेसम्मकै उच्च विन्दु हो। त्यसैगरी मंगलबार कारोबारमा पनि व्यापक उत्साह देखिएको छ। ११ अर्ब ३५ करोड बढीको कारोबार भएको छ। यो पनि अहिलेसम्मकै उच्चतम भोलुम हो।
नेप्सेको अनुसार आज सबैभन्दा धेरै नेपाल पुनर्बीमा कम्पनीको सर्वाधिक कारोबार भएको छ । कम्पनीको प्रतिकित्ता शेयरमुल्य १६ सय ९३ रुपैयाँ अन्तिम मुल्य कायम भई ६७ करोड ९२ लाख भन्दा बढीको कारोबार भएको हो ।
त्यसैगरी, नेशनल लाइफ इन्स्योरेन्स लिमिटेडको ३१ करोड ५६ लाख भन्दा बढीको कारोबार भएको छ । कम्पनीको १२ सय ३६ रुपैयाँ प्रतिकित्ता अन्तिम शेयरमुल्य कायम भएको छ । त्यस्तै, अरुण कावेली पावर लिमिटेडको ३१ करोड ४३ लाख र आइएमी जेनरल इन्स्योरेन्सको ३० करोड ८४ लाख भन्दा बढीको कारोबार भएको छ।
कोरोनाको जोखिम र लकडाउनले सबैतिर ठप्प भइरहेका बेला यति धेरै कारोबार हुनुलाई सेयर बजार अझ् बढ्ने संकेतका रुपमा लिइएको छ।
नयाँ रकेर्ड कायम भएको बजारमा अधिकांश कम्पनीको सेयर मूल्य बढेको छ । जसमध्ये एकैदिन ३३ कम्पनीको सेयर मूल्य सर्किट लेभलका किनबेच भएको छ । २१५ कम्पनीको सेयर कारोबार भएको बजारमा २१ कम्पनीको सेयर मूल्य सामान्य प्रतिशतले घटेका छन् भने बाँकी सबैकाे सेयर मूल्य बढेको छ ।