दोश्रो लहरको कोरोना फैलिएसँगै टीकापुर अस्पतालमा हालसम्म २६ जनाले ज्यान गुमाएका छन् । टीकापुर अस्पतालले जारी गरेको विज्ञप्ति अनुसार दोश्रो लहरको कोरोनाका कारण २६ जनाले ज्यान गुमाएका हुन् ।ज्यान गुमाउनेमा टीकापुर, भजनी र लम्कीचुहा नगरपालिका तथा जानकी, बर्दगोरिया र जोशीपुर गाउँपालिकाका छन् ।
ज्यान जानेमा सबैभन्दा बढी टीकापुर नगरपालिकाका छन् त्यहाँका १४ जनाले अस्पतालमा ज्यान गुमाएका छन् । त्यस्तै जानकी गाउँपालिकाका ६ जना, जोशीपुर गाउँपालिकाका ३ जनाले ज्यान गुमाएका छन् । भजनी, लम्की चुहा नगरपालिका तथा बर्दगोरिया गाउँपालिकाका एक एक जनाले ज्यान गुमाएका छन् ।
मृतक अधिकांशमा स्वासप्रस्वास तथा फोक्सो सम्बन्धी समस्या रहेको अस्पतालले जनाएको छ ।अस्पतालका मेडिकल सुपरीटेण्डेन्ट डाक्टर रेमकुमार राईले पछिल्लो २४ घण्टामा दुई जनाले ज्यान गुमाएको बताए । डाक्टर राईका अनुसार हालसम्म अस्पतालबाट ४४ जना कोरोना जितेर घर फर्किएका छन् ।अस्पतालमा हाल कोभिड उच्च उपचार कक्षमा ११ जना, कोभिड जनरल वार्डमा ११ जना तथा अब्जरभेसनमा २१ जना गरी ४३ जनाको उपचार भइरहेको छ ।
अस्पतालले विरामीको चाप बढ्न थालेपछि ओपिडी, इमरजेन्सी तथा बरण्डामा समेत बिरामी राखेर उपचार गरिरहेको छ ।अस्पतालका कोरोना फोकल पर्सन डाक्टर रमेशप्रसाद उपाध्यायले अक्सिजनको ब्याकअप कम हुँदै गएकाले थप बिरामी भर्ना लिएर उपचार गर्न सम्भव नभएको बताए । उनले तत्काल अक्सिजनको ब्याकअपको व्यवस्था भए बरण्डामा राखेर समेत बिरामीको उपचारमा राहत हुने बताए । अस्पतालमा भर्ना भएका प्रायः सबै बिरामीलाई अक्सिजन सर्पोट दिइएको छ ।