समयमा अक्सिजन नपाउँदा रूपन्देहीको बुटवलमा ५ जना र सिद्धार्थनगरमा ४ जना कोरोना संक्रमित बिरामीको ज्यान गएकोमा पूर्वस्वास्थ्य मन्त्री दीपक बोहराले गम्भिर ध्यानाकर्षण भएको बताएका छन् ।
राप्रपाका वरिष्ठ नेतासमेत रहेका पूर्व स्वास्थ्य मन्त्री बोहराले आज एक विज्ञप्ती जारी गर्दै सरकारको गम्भिर लापरवाहीको कारणले कोरोना सङ्क्रमितले ज्यान गुमाउनुपरेको बताएका छन् ।
विज्ञप्तीमा भनिएको छ “यो सरकारको गम्भिर लापरवाहीको परिणाम हो । कोरोनाको दोश्रो लहरको भयावह स्थितीमा अक्सिजनको प्रयाप्त व्यवस्था गर्न नसक्नु र अस्पतालहरूले अक्सिजनको कारणले नयाँ बिरामी लिन नसक्ने जस्तो सुचना प्रकाशित गर्दा समेत त्यसको व्यवस्थापन गर्न नसक्नु भनेको सरकारको लाचारीपना र गैरजिम्मेवार कार्य हो । यसको म घोर भत्सर्ना गर्दछु ।”
समयमा अक्सिजन उपलव्ध हुन नसकेको घटनाको छानविन गरी दोषि माथि कारवाही गर्न बोहराले स्थानीय प्रशासनलाई आग्रह गरेका छन् ।
अहिले देशभरी नै अक्सिजनको अभाव भएको छ । काठमाडौंका केही नीजि अस्पतालहरुले अक्सिजनको आपूर्ति नभएको हुनाले उपचार गराइरहेका सङ्क्रमितलाई जे जस्तो अवस्थामा छन् त्यही अवस्थामा डिस्चार्ज गरेका छन् ।
चीन सरकारले अनुदानमा उपलव्ध गराएको २० हजार थान अक्सिजन सिलिन्डर लिन गएको नेपाल वायू सेवा निगमको जहाज ४ सय वटा मात्रै अक्सिजन लिएर मङ्गलबार काठमाडौं अवतरण गरेको छ ।
