बुटवलको कोरोना विशेष अस्पतालमा अक्सिजन सकिएपछि एकै पटक पाँच विरामीको मृत्यु भएको छ ।
बुटवलको धागो कारखानास्थित कोरोना विशेष अस्पतालमा आघा घण्टा अक्सिजन सप्लाई रोकिएको थियो ।
अक्सिजन सप्लाई रोकिएपछि पाँच बिरामीको मृत्यु भएको अस्पतालका सूचना अधिकारी डा. विष्णु गौतमले पुष्टि गरे । ‘अक्सिजन सकियो, आधा घण्टा दिन सकेनौं, उहाँहरुको मृत्यु भयो, उनले भने,‘अहिले ६ वटा सिलिण्डर आएको छ एक डेढ घण्टालाई पुग्छ ।’
मृत्यु हुनेमध्ये ४ जना बुटवल उपमहानगरपालिकाका हुन् । नवलपरासीका १ जना छन् । मृत्यु हुनेमा बुटवल ११ का २९ वर्षिय पुरुष, वार्ड नम्बर ८ का ५२ वर्षीय पुरुष, बुटवल १२ की ५९ वर्षीया महिला र बुटवल १३ का ५२ वर्षीय पुरुष रहेका छन् । अक्सिजन नै नपाएर बर्घाटका ४४ वर्षीय पुरुषको पनि मृत्यु भएको छ ।
अहिले देशभरी नै अक्सिजनको अभाव भएको छ । काठमाडौंका केही नीजि अस्पतालहरुले अक्सिजनको आपूर्ति नभएको हुनाले उपचार गराइरहेका सङ्क्रमितलाई जे जस्तो अवस्थामा छन् त्यही अवस्थामा डिस्चार्ज गरेका छन् ।
चीन सरकारले अनुदानमा उपलव्ध गराएको २० हजार थान अक्सिजन सिलिन्डर लिन गएको नेपाल वायू सेवा निगमको जहाज ४ सय वटा मात्रै अक्सिजन लिएर हिजो काठमाडौं अवतरण गरेको छ ।