बार्सिलोनाले ला लिगाको उपाधि जित्नबाट लगभग बञ्चित भएको छ । मङ्गलबार लेभान्टेसँग ३–३ गोलको बराबरी खेलेसँगै बार्सिलोनाले उपाधिलाई ‘गुड बाई’ गरेको छ ।
गए राति बार्सिलोनाका लागि कप्तान लियोनेल मेस्सी, पेड्री र औसमाने डेम्वेलेले गोल गर्दा लेभान्टेका गोन्जालो मेलेरो, जोस लुइस मोरालेस र सर्जियो लिओनले गोल फर्काए ।
लेभान्टेको मैदानमा भएको खेलमा दुई पटक लिएको अग्रता जोगाउन नसक्दा बार्सिलोना बराबरीमा रोकिएको हो । खेलको २५औं मिनेटमा कप्तान मेस्सीको गोलबाट बार्सिलोनाले सुरुवाती अग्रता लिएको थियो । ३४औं मिनेटमा पेड्रीले गोल गर्दै बार्सिलोनालाई पहिलो हाफमा २–० को अग्रता दिलाए ।
५७औं मिनेटमा मिरामोनको पासमा गोल गर्दै खेललाई २–१ को स्थितिमा ल्याए । त्यसको दुई मिनेटपछि रोजरको पासमा जोस लुइस मोरालेसले गोल गर्दै उसलाई बराबरीमा फर्काए ।
६४औं मिनेटमा डेम्वेलेले गोल गर्दै बार्सिलोनालाई पुनः ३–२ ले अघि बढाए । तर ८३औं मिनेटमा लिओनले गोल गर्दै खेललाई ३–३ गोलको बराबरीमा ल्याउँदै बार्सिलोनालाई जितबाट वञ्चित गराए ।
यो बराबरीसँगै बार्सिलोनाले शीर्षस्थानमा उक्लने मौका गुमाएको छ । बार्सिलोनाको ३६ खेलबाट ७६ अङ्क पुगेको छ । एक खेल कम खेलेको एथ्लेटिको ७७ अङ्क जोडेर शीर्षस्थानमा छ । यस्तै, एक खेल कम खेलेको रियल ७५ अङ्क जोडेर तेस्रो स्थानमा छ ।